Foto: Túrkistan oblysy ákiminiń baspasóz qyzmeti
Túrkistan oblysynyń ákimi Darhan Satybaldynyń tóraǵalyǵymen ótken jiynda eldi mekenderdi kógaldandyrý, «Jasyl beldeýdi» damytý baǵytyndaǵy jumystar talqylandy, dep habarlaidy «Ult aqparat».
Óńir basshysy aǵashtardy otyrǵyzyp, kútip-baptaý jáne kúzgi maýsymdyq aǵash kóshetterin otyrǵyzýǵa daiyndyq jumystaryn jandandyrýdy tapsyrdy.
– Memleket basshysynyń eldi mekenderdi abattandyrý, aimaqtardy kógaldandyrý jónindegi tapsyrmasy bar. Osy baǵytta jumysty júieleý kerek. Aǵash otyrǵyzýda kemshilikter kóp. Egilgen aǵashtardyń sapasyn aýdan, qala ákimderi qadaǵalap, osy ispen ainalysýy tiis. Kúzgi aǵash kóshetterin otyrǵyzýǵa qajetti oryndardy daiyndaýdy, olardyń sýǵarý júielerin qosýdy jáne tiisti aýmaqtardy qorshaý jumystaryn júrgizýdi aǵash otyrǵyzý naýqany bastalǵanǵa deiin aiaqtaýy tiis. Kósheti ónbegen merdigerler ony qaitadan egip, jumysyn sapaly aiaqtasyn. Zamanaýi tuqymaqtardy kóbeitýdi taǵy da qaitalap aitamyn. Sonymen qatar búgingi kúnge deiin qansha aǵash egildi, onyń ishinde qanshasy óngeni týraly málimet ázirlenip, taldaý júrgizilsin, – dedi oblys ákimi Darhan Satybaldy.
Májiliste Túrkistan oblystyq tabiǵi resýrstar jáne tabiǵat paidalanýdy retteý basqarmasynyń basshysy Qairat Abdýaliev baiandama jasady. baiandama jasady. Onyń aitýynsha, Memleket basshysynyń 15 mln kóshet egý tapsyrmasyna sáikes, 2021-2025 jyldary Túrkistan oblysynda 1,1 mln kóshet otyrǵyzý josparlanǵan. Osyǵan orai, «Túrkistan oblysynyń eldi mekenderin kógaldandyrýdyń 2023-2025 jyldarǵa arnalǵan is-shara jospary» bekitilip, 2 mln 891 myń dana kóshet otyrǵyzý kózdelgen. Oblystyń eldi mekenderin kógaldandyrý josparyna sáikes, 2022-2024 jyldar aralyǵynda 1 mln 832 myń dana kóshet otyrǵyzyldy. Onyń ishinde, Túrkistan qalasyna 512 myń dana kóshet bosatylǵan. Biyl kúzgi kóshet otyrǵyzý naýqany aýdan, qalalardyń aýa-raiyna qarai qarasha aiynan bastalady jáne olardyń suranystaryna sáikes, 516 myń dana kóshet otyrǵyzý josparlanyp otyr.
Jalpy Túrkistan qalasynyń ainalysynan qazirgi tańǵa «Jasyl beldeý» qurýǵa 30 000,0 gektar jer alý mejelengen. Onyń 28 335,0 gektar jer telimine memlekettik akt alynyp, memlekettik orman qory sanatyna aýystyrylǵan. Túrkistan qalasy men Saýran jáne Otyrar aýdandarynyń jer ielenýshilerine teń kólemde jer berý arqyly «Jasyl aimaq» KMM-niń memlekettik orman qoryn ulǵaitý jumystary qajettilikke bailanysty jalǵasyn tabady.
2024 jyldyń kúz jáne 2025 jyldyń kóktem ailarynda «Jasyl beldeý» aýmaǵynda orman ekpelerin otyrǵyzý jáne tolyqtyrý jumystary atqyrylýda. Negizgi basymdyq Túrkistan qalasyn ainala qorshap turǵan «Jasyl beldeýdiń» 8 185 gektar aýmaǵynda júrgiziledi. Otyrǵyzýǵa qajetti kóshetter Túrkistan qalasynyń aýmaǵyna jersingen mekemeniń tuqymbaǵyndaǵy kóshetter paidalanylady.
