Foto: Túrkistan oblysy ákimdigi
Túrkistan óńirinde sońǵy bir aidyń ishinde Qazyǵurt, Saýran, Saryaǵash jáne Keles aýdanynda 570 gektarǵa qosymsha 4 indýstrialdy aimaq quryldy. Bul týraly búgin oblys ákimi Darhan Satybaldynyń tóraǵalyǵymen ótken apparat májilisinde aityldy.
Májilis barysynda indýstrialdy aimaqtardy jobalarmen tolyqtyrý jaiy talqylandy. Óńir basshysy jaýaptylarǵa bul baǵyttaǵy jumysty kúsheitýdi tapsyrdy.
«Kásipkerlik jaǵynan jáne sý máselesi boiynsha aýda, qala ákimderi de esebin daiyndasyn. Óz aýmaqtaryńyzdaǵy indýstrialdy aimaqtyń infraqurylym máselesin de birlese otyryp, ońtaily sheshý qajet. Jan-jaqty izdenip, óńirdiń damýy úshin erekshe jobalardy júieli túrde júzege asyryńyzdar», – dedi oblys ákimi Darhan Satybaldy.
Oblystyq kásipkerlik jáne ónerkásip basqarmasynyń basshysy Nurjigit Myrzahmetov jiyn barysynda baiandama jasap, atqarylǵan jumystarǵa toqtaldy. Sonymen qatar infraqurylymdyq alańdardy damytý boiynsha birqatar usynys joldady. Jalpy indýstrialdy aimaqtardyń infraqurylymyna biýdjetten jumsalǵan qarjy 10 ese investitsiia tartýǵa múmkindik beredi deidi basqarma basshysy. Sondai-aq aýdan jáne qala ákimdikterimen birge indýstrialdy aimaqtarda senbilik jumystary uiymdastyrylyp turatynyn jetkizdi.
Jańa indýstrialdy aimaqtar óńirdiń damýyna oń serpin beredi. Sonyń biri Keles aýdany, Aqtóbe aýyldyq okrýginen, Jetisai baǵytyndaǵy joldyń boiynan 300 gektar jerge «Keles» indýstrialdy aimaǵy quryldy. Infraqurylym núktelerin esepke ala otyryp, aýdan ákimdigi jer telemin de usynǵan. Al Túrkistan indýstrialdy aimaǵynan soǵylǵan 2 braýnfildte búgingi tańda jihaz óndirý tsehy jáne shulyq buiymdaryn óndirý tsey jumys istep otyr. Munda jergilikti turǵyndar jumyspen qamtylǵan.
Óńirde óndiristik park boiynsha 39 óndiristik ǵimaratty qurý josparlanǵan. 1-kezeń boiynsha 10 ǵimarat qurylysy aiaqtalyp, investitsiia somasyna 10 joba iske asyrylyp jatyr. Al 2-kezeń boiynsha 12 óndiristik ǵimarattyń qurylys jumystary bastaldy. Óndiris oryndarynda ornalasatyn investitsiialyq jobalar pýly jasaqtalyp, memorandýmdarǵa qol qoiyldy. 3-kezeń boiynsha 17 óndiristik ǵimarattyń qurylys jumystary da bastalǵan. Keibiri kásipkerlerdiń esebinen de soǵylyp jatyr. Saýran aýdanynda Qarashyq, Shornaq, Iassy aýyldyq okrýgterinde jalpy kólemi 70 myń sharshy metr bolatyn 49 óndiristik ǵimarat salý jumystary bastaldy. Jobalardyń basym kópshiligi jihaz óndirý salasynda. Munda da jańa jumys oryndary ashylyp, jergilikti turǵyndar turaqty jumysqa ornalasatyn bolady.
Indýstrialdy aimaqtarmen qatar, jobalardy «TURAN» arnaiy ekonomikalyq aimaǵyna tartý jumystary júrgizilip jatyr. Olardyń qatarynda, sheteldik kompaniianyń tekstil klasteri, Polimerli qubyrlar, Taý-ken metallýrgiia keshenine arnalǵan qurylǵylar zaýyttary bar.
Aita keteiik, búginde oblys kóleminde 594 gektardan turatyn 10 indýstrialdy aimaq bar. Onda quny 125,6 mlrd teńge bolatyn 87 joba júzege asyrylyp jatyr. Jobalardyń basym bóligi qurylys materialdaryn óndirý, jeńil jáne jihaz ónerkásibi salasynda jumyldyrylǵan. Al jańadan qurylǵan jumys oryndarynda, sol mańdaǵy jergilikti turǵyndar eńbek etip jatyr.
