Túrkistan oblysynda aldaǵy eki jyl kóleminde 2,5 trln teńge bolatyn 115 joba júzege asyrylady. Bul - týrizm, qurylys, óńdeýshi ónerkásip, balamaly energiia jáne jasyl ekonomika salasyndaǵy jobalar, dep habarlaidy "Ult aqparat".
Óńirde sonymen qatar sońǵy 2 jylda shaǵyn jáne orta kásipkerlikpen ainalysatyndardyń sany 15 myńǵa artyp, 141 myńǵa jetken.
2020 jyly oblys kásipkerleri quny 554 mlrd teńgeniń ónimin óndirgen.
Biyl bul kórsetkshiti 900 mlrd teńgege jetkizemiz dep otyr. Máselen, oblys ortalyǵy bolǵaly beri Túrkistan qalasynda qurylys qarqyny báseńdegen emes.
Kieli shaharda «mádeni-rýhani» jáne «ákimshilik iskerlik oralyǵy» bolyp, eki baǵytta damyp keledi.
Kezinde Elbasy ózi qazyǵyn qaǵyp, josparyn syzyp bergen osy eki ortalyqtaǵy nysandardyń barlyǵy qazir aiaqtalyp, paidalanýǵa berildi.
Odan bólek, munda turǵyn úi qurylysy da jandanyp keledi.
2019 jyly shaharda 150 myń sharshy metr turǵyn úi tapsyrylsa, al biyl 390 myń sharshy metr turǵyn úi el igiligine beriledi dep josparlanǵan.
Budan bólek, jańa jobalar da júzege asyrylyp jatyr.
«Jańa jobalar bastalyp, 20 qabatty 2 turǵyn úidiń qurylysy júrgizilýde. Odan bólek, 18 qabatty biznes ortalyǵy jáne kaskatty 16 úidiń qurlysy bastaldy. Jeke salýshylar esebinen 5 qabatty úiler, SPK arqyly da qurylys júrgizilip jatyr. Biylǵy jylǵa oblys kóleminde 790 myń sharshy metr turǵyn úi alańyna tapsryýymyz kerek», - dedi oblystyq qurylys basqarmasynyń basshysy Toqtar Úsipaliev.
Túrkistan oblysy qurylǵan eki jarym jyldyń ishinde óńirge 3,5 mlrd teńge investitsiia tartylǵan. Bul 2008 jylmen salystyrǵanda 27 ese kóp.
Jeke investorlardyń qarjysy esebinen Túrkistan qalasynda birneshe jobalar iske asyryldy. Jýyrda ǵana jańadan salynǵan halyqaralyq áýejai iske qosyldy.
Hazret Sultan Airport-ynan Nur-Sultan men Almaty qalalaryna áýe reisteri ushýda.
Elimizdiń ózge qalalaryna, shet elderge, sonyń ishinde Túrkiianyń Ystambul qalasyna áýe reisteri ashyldy.
Halyqaralyq áýejai saǵatyna 450 jolaýshyny qabyldap, jylyna 3 mln jolaýshyǵa qyzmet kórsete alady.
Áýejaidyń ushý-qoný jolaǵynyń parametri barlyq áýe kemelerin qabyldaýǵa múmkindik beredi.
Elimiz táýelsizdik alǵaly birinshi boi kótergen zamanaýi áýejaiǵa aviatsiia salasyndaǵy halyqaralyq uiymdardyń, atap aitqanda IKAO men IATA-nyń kodtary berilgen.
Jańa áýejai túrki áleminiń altyn besigi – Túrkistan qalasyn álemniń iri qalalarymen jalǵastyratyn bailanys jelisine ainalmaq.
Oblys ortalyǵynda búginde sondai-aq, bes juldyzdy qonaq úiler de boi kóterýde.
Sonyń biri retinde Hilton qonaqúiiniń alǵashqy jelisi Hampton by Hilton Turkistan qonaqúiiniń resmi ashylýyn aitýǵa bolady.
«Bul eń aldymen strategiialyq mańyzdy salaǵa úlken úles. Týrizmdi damyta otyryp, Túrkistanǵa kelgen qonaqtar halyqaralyq deńgeidegi qyzmetti qoljetimdi baǵamen paidalana alady. Sonymen qatar, qonaqúi Túrkistannyń mádeni-rýhani ortalyǵyna úilesimdi», - dedi Túrkistan oblysy ákiminiń birinshi orynbasary Arman Jetpisbai.
Qonaqúi Túrkistannyń mádeni-rýhani ortalyǵynda ornalasqan. Iasaýi kesenesi jaqyn, Uly Dala ortalyǵy men Visit Centre Turkistan mańaiynda ornalasqan.
Syrtqy beti kóne ǵasyrdyń ǵimarattaryn eske túsiretin Marokko stilindegi eski qam kirpishten soǵylǵan. Orta ǵasyr men qazirgi dástúrlerdi sátti úilestire otyryp, qalanyń stilin tolyqtyra túsken.
Bir jyldyń ishinde boi kótergen qonaqúidiń jalpy alańy Top Tobe jeke banket keshenin qosqanda 9000 sharshy metrdi quraidy.
Standartty sanattaǵy 120 nómir bar. Múmkindigi shekteýli adamdarǵa arnaiy jasaqtalǵan bólmeler qarastyrylǵan.
Al, Hilton – quramyna ártúrli sanattaǵy 17 qonaqúi brendi kiretin dúnie júzine áigili qonaqúiler jelisi sanalady.
Endi birer kúnde Túrkistanda taǵy Orta Aziiadaǵy teńdesi joq joba – Kerýen sarai kesheni paidalanýǵa beriledi dep josparlanyp otyr.
Jalpy oblys qurylǵaly beri óńirde 100-den asa invest joba iske asyrylǵan.
«Ótken jyly Elbasymyz úlken jobany atap ótti, ol Túrkistan-Shymkent- Tashkent baǵytynda júrdek poiyzynyń qurylysyn biyl bastaǵaly otyrmyz. Bul joba ekonomikalyq turǵydan da, týristik baýyrlas eki elge de paidasy kóp joba dep sanaimyz. Sebebi 7 mln týrist Ózbekstannan keledi. Qazaqstanǵa nemese Ózbekstanǵa kelgen qonaq eki elge de ońai jetýge múmkindik bolady. 1 saǵat 45 minýtta Túrkistannan Tashkentke jetýge múmkinshilik bolady»,- dedi oblys ákiminiń orynbasary Meiirjan Myrzaliev.
Budan bólek, aimaqta 10 joba iske qosylyp, 6 joba jyl sońyna deiin aiaqtalady dep josparlanýda.
Sonymen qatar, oblysta aýyl sharýashylyǵy salasy qarqyndy damyǵan. Óńirde 1 myń gektarǵa jańbyrlatyp sýǵarý júiesi engizildi.
Munda mal azyq daqyldary ósiriledi. Ónim joba sheńberinde avstraliialyq tehnologiiamen salynyp jatqan 10 myń basqa arnalǵan bordaqylaý alańyna jetkiziletin bolady.
«Avstraliialyq tehnologiianyń tiimdiligi – osynda bordaqylanyp otyrǵan maldar táýligine kemi 1-2 kg salmaq qosady. Óitkeni jem malǵa pisirilip beriledi. 3-shi jobamyz 50 gektarǵa jylyjai keshenin salý jobasyn bastap kettik. Qazir qarjylandyrýǵa qujattaryn daiyndap jatyr»,- deidi oblystyq aýylsharýashylyǵy basqarmasynyń basshysy Nurbek Badyraqov.
Aita keteiik, Túrkistan oblysynyń sharýalary ótken jyly 730 mlrd teńge bolatyn 2,5 mln tonna ónim óndirdi.
Sóitip respýblikada 2-orynǵa shyqty. Jinalǵan ónimniń 105 mln AQSh dollary bolatyn, 1 mln tonnasyn eksportqa jóneltti.
Sondai-aq respýblika boiynsha et eksportynyń 75 paiyzy da osy óńirge tiesili. Ótken jyly óńir kásipkerleri 5 myń tonna etti shetelge shyǵardy.
Jalpy Túrkistan oblysynda 143 myń basqa laiyqtalǵan bordaqylaý alańdary jumys isteidi.
