© AP Photo / Jean-Francois Badias
Túrkistan qalalyq sotynda 6 politsiia qyzmetkerine qatysty azaptaý jáne zańsyz ustaý faktileri boiynsha qylmystyq is qaraldy, dep habarlaidy "Ult aqparat".
Túrkistan sottary resmi paraqshasynyń málimetinshe, aýdandyq politsiia bóliminiń 6 qyzmetkeri, adamdar toby bolyp, mal urlyǵyna bailanysty qylmystyq quqyq buzýshylyqtar jasaǵandyǵyn moiyndatý, aiǵaqtardy alý, qylmysty ashý boiynsha kórsetkishterin jasandy túrde kóterý maqsatynda jábirlenýshiler D. men O.-ǵa qorqytý jáne fizikalyq kúsh qoldanýmen májbúrleý arqyly tán zardaby men psihikalyq zardap keltirip, azaptaýlar jasap, politsiia bóliminde zańsyz ustaǵan.
"Prokýror taǵylǵan aiypty qoldap, sottalýshylardy kináli dep tanýdy, túpkilikti negizgi jaza retinde árqaisysyna 5 jyl 6 ai merzimge bas bostandyǵynan aiyrý jazasyn taǵaiyndaýdy surady.
Al jábirlenýshiler sottalýshy Sh.-ǵa ǵana keshirim beretindigin, qalǵan sottalýshylarǵa prokýror suraǵan jazasyn taǵaiyndaýdy surady.
Óz kezeginde sottalýshylar jáne advokattar sottalýshylardyń kináli emes ekenderin aityp aqtaýdy ótindi" - delingen habarlamada.
Sot jaza taǵaiyndaý kezinde jeńildetetin mán-jailarǵa jábirlenýshilerdiń sottalýshy Sh.-ǵa keshirim bergenin, Sh. men A.-nyń qylmys jasaýda belsendi ról atqarmaǵanyn jáne barlyq sottalýshynyń buryn sotty bolmaǵynyn, al aýyrlatatyn mán-jaiǵa bergen anttarynyń buzýlýyn jatqyzdy.
"Sot úkimimen barlyq 6 sottalýshy QK-niń 146-baby 2-bóliginiń 1), 2) tarmaqtarynda jáne 414-babynyń 1-bóliginde kózdelgen qylmystyq quqyq buzýshylyqtardy jasaǵany úshin kináli dep tanyldy.
Q., E., A., Ý.-ǵa arnaýly ataqtarynan jáne quqyq qorǵaý organdarynda 3 jyl qyzmetpen ainalysý quqyǵynan aiyra otyryp, 4 jyl merzimge bas bostandyǵynan aiyrý jazasy taǵaiyndaldy.
Sh. men A.-ǵa arnaýly ataqtarynan jáne quqyq qorǵaý organdarynda 3 jyl qyzmetpen ainalysý quqyǵynan aiyra otyryp, 3 jyl 6 ai merzimge bas bostandyǵynan aiyrý jazasy taǵaiyndaldy. Jazany qylmystyq-atqarý júiesiniń ortasha qaýipsiz mekemelerinde óteý taǵaiyndaldy" - delingen habarlamada.
Sot úkimi zańdy kúshine engen joq.
