Túrkistan oblysynda koronavirýs infektsiiasyn juqtyrǵan 11 kúndik sábidiń júregine ota jasaldy. Sairam aýdanyndaǵy aýrýhanaǵa aýyr halde jetkizilgen shaqalaqtyń dene qyzýy kóterilip, entigý belgileri bolǵan, dep habarlaidy "Ult aqparat".
Oblystyq qoǵamdyq densaýlyq saqtaý basqarmasynyń málimetinshe, meditsinalyq jedel-járdem qyzmetimen jetkizilgen náreste birden jansaqtaý bólimine jatqyzylǵan. Júrgizilgen diagnostikalyq zertteýlerdiń nátijeleri náresteden týa bitken júrek aqaýy belgileri bar ekenin kórsetken.
Júrek qalqasynyń tarylýynan balanyń ómirine qaýip tóngen. Oǵan qosa jańa týǵan sábidiń pnevmoniia men koronavirýs infektsiiasyna shaldyqqany anyqtalǵan.
Oblystyq balalar aýrýhanasynyń kardiohirýrgy Almat Baisalov jetekshilik etken bilikti dárigerler quramy asa mańyzdy sheshim qabyldap, sábige shuǵyl túrde ota jasaǵan.
Eki saǵatqa sozylǵan operatsiia sátti ótip, kishkentai naýqas aman qalǵan. Otadan keiin birden qan júrip, qan qysymy da rettelgen.
Dárigerlerdiń aitýynsha, koronavirýs infektsiiasynyń taralýyna jol bermes úshin operatsiia jansaqtaý bóliminde júrgizilgen. Sábi qazir de sol jerde em qabyldaýda. Oǵan jeke dáriger men jeke medbike bekitilgen.
Al, bala ómirin arashalap qalǵan dárigerlerdiń qatarynda kardiohirýg-dárigerler Almat Baisalov pen Almaz Áshirov jáne anesteziolog Aqjol Ábdiraiymov, reanimatolog-dárigerler Ǵabitjan Ismailov pen Erlan Rahymov bar.
Sábidiń ata-anasy aq halatty abzal jandarǵa alǵysyn aitty.
