Foto: Baýyrjan Naimanov
«Jumys kúshiniń mobildiligin arttyrý úshin erikti túrde qonys aýdarýǵa járdemdesý» baǵyty sheńberinde Soltústik Qazaqstan jáne Pavlodar oblystary ókilderiniń qatysýymen «Qonys aýdarý» jármeńkesi ótti.
Jetisai qalasynda ótken is-sharaǵa 250-ge jýyq turǵyn qatysty.
«Qonys aýdarý» jármeńkesine Jetisai aýdan ákiminiń orynbasary Serik Pirimbekov pen «AMANAT» partiiasy Jetisai aýdandyq filialynyń atqarýshy hatshysy Asqar Qainazarov qatysty. Jármeńke barysynda Soltústik Qazaqstan jáne Pavlodar oblystarynan kelgen delegatsiia músheleri óńirlerdiń jai-kúiimen, jergilikti azamattardyń tynys-tirshiligimen, óńirdiń perspektivasymen tanystyrdy.
Qonys aýdarýǵa nietti azamattarmen tildesip, memleket soltústik oblystarǵa qonys aýdarǵan azamattardyń otbasy múshelerine bir ret 70 AEK (258 440 teńge) mólsherinde aqsha, alǵashqy ýaqytta úi jaldaýǵa qarjy beriletinin, sonymen qatar, qysqa ýaqytqa kásibi oqýǵa jiberip, jumysqa turǵyzý, jeńildikpen baspana alýǵa kómektesýdi mindetine alatynyn túsindirdi.
Nasihat toby Maqtaaral, Saryaǵash, Keles, Qazyǵurt aýdandarynyń turǵyndarymen de kezdesti. Onda da Soltústik óńirdegi aýyl aimaqtyń tirshiligi jóninde keń kólemdi málimet bergen sala mamandary, kópshilikti jumys kúshi az aimaqqa qonys aýdarýǵa shaqyrdy.
«Soltústiktegi jaǵdaimen tanysyp jatyrmyz. Egerde kóńilimizden shyqsa qonys aýdarýǵa daiynbyz. Ózim maquldap otyrmyn. Ákimdik jumys taýyp berse, kómektesse barýǵa bolady. Qazir sharttarymen tanysyp jatyrmyn. Eki-úsh jyldan beri atalǵan baǵdarlamany estip kelemin. Ońtústik pen Soltústiktiń aiyrmashylyq joq dep oilaimyn. Barlyǵy qazaqtyń jeri. Bizdiń Otanymyz. Sodan nar táýekel etip otyrmyn», - dedi jergilikti turǵyn Erhan Berdibekov.
Qazaqstan Eńbek jáne halyqty áleýmettik qorǵaý ministrligi 2024 jylǵa respýblika boiynsha 7050 kvota bólip, qandastar men qonys aýdarýshylar úshin memlekettik qoldaý kórsetetin 7 oblys belgilengen bolatyn. Olardyń qatarynda Soltústik Qazaqstan oblysy (2 702 adam), Pavlodar oblysy (2 603 adam), Qostanai oblysy (950 adam), Shyǵys Qazaqstan oblysy (372 adam), Abai oblysy (255 adam), Ulytaý oblysy (132 adam), Qaraǵandy oblysy (36 adam).
Bólingen kvota negizinde osy jyldyń 8 aiynda Túrkistan oblysynan 288 otbasydan 1 116 adam qonys aýdardy. Naqty kórsetsek, Shyǵys Qazaqstan oblysyna 18 otbasy (71 adam), Qostanai oblysyna 18 otbasy (71 adam), Pavlodar oblysyna 127 otbasy (592 adam), Soltústik Qazaqstan oblysy 110 otbasy (318 adam), Qaraǵandy oblysyna 2 otbasy (11 adam), Abai oblysyna 8 otbasy (23 adam), Ulytaý oblysyna 5 otbasy (30 adam).
Jalpy elimiz boiynsha 3 494 qonys aýdarǵandardyń 32%-y Túrkistan oblysynyń úlesinde. Olardyń ishinde eńbekke jaramdy 538 adamnyń 304-i jumysqa ornalasqan. 2015 jyldan beri jumys kúshi az Soltústik óńirlerine halqy tyǵyz ornalasqan Ońtústik aimaqtardan azamattardy kóshirý jumystary nátijesinde búgingi kúnge deiin 14 874 adam nemese 3 358 otbasy qonys aýdarǵan.
Memleket soltústik oblystarǵa qonys aýdarǵandardyń otbasy múshelerine bir ret 70 AEK (258 440 teńge) mólsherinde aqsha, alǵashqy ýaqytta úi jaldaýǵa qarjy beredi. Budan bólek, bilik olardy qysqa ýaqytqa kásibi oqýǵa jiberip, jumysqa turǵyzýy, jeńildikpen baspana alýǵa kómektesýi tiis. Al qonys aýdarǵandarǵa jumys usynǵan jumys berýshilerge 400 AEK (1 476 800 teńge) sýbsidiia beriledi.
«Qonys aýdarý» jármeńkesi erteń Túlkibas, Ordabasy, Sairam, Báidibek aýdandarynda ótedi.
