Túrkistan oblysy Otyrar aýdanynda kásipkerdiń úiine qaraqshylyq shabýyl jasaldy. Qylmystyq oqiǵa aýdan ortalyǵy Sháýildir aýylynda bolǵan, dep habarlaidy "Ult aqparat".
Betine betperde kigen úsheý túngi úshter shamasynda kásipkerdiń úiine tereze arqyly kirip, uiyqtap jatqan erli-zaiyptylardy pyshaqpen qorqytqan. Artynsha úi iesiniń jubaiyn bailap, qymbat tony men altyn buiymdaryn alǵan. Sondai-aq, 4 uialy telefony men eki ańshy myltyǵyn da áketken.
Jábirlenýshilerge kelgen shyǵynnyń jalpy kólemi - 1 mln teńge. Qaraqshylar ketken soń kásipker úiine politsiia shaqyryp, kómek suraǵan. Oqiǵa ornyna jetken kriminaldyq politsiia qyzmetkerleri 4 kúdiktiniń jeke tulǵasyn anyqtap, olardy bir táýlikten soń ustady.
Qaraqshylar Otyrar, Maqtaaral aýdandary men Shymkent jáne Nur-Sultan qalalarynyń turǵyny bolyp shyqty. Shymkent qalasynan ustalǵan kúdiktilerdiń biri buryn sotty bolǵan. Tergeý barysynda urlanǵan zattardy lombardqa ótkizip, qylmysyn jasyrý úshin ańshy myltyǵyn jerge kómip tastaǵany belgili boldy.
«Jedel izdestirý sharalaryn júrgizý barysynda kriminaldyq politsiia basqarmasy men Otyrar aýdandyq politsiia basqarmasy qyzmetkerleri bul aýyr qylmysty ashyp, kúdikti degen tórt tulǵa ustaldy. Olar ýaqytsha ustaý abaqtysyna qamaldy. Qazirgi tańda tiisti tergeý amaldary júrgizilýde», - deidi Túrkistan oblystyq PD kriminaldyq politsiia basqarmasynyń bastyǵy Qurmanbek Sahov.
