Túrkistan oblysynda qarly borannan 400-ge jýyq adam qutqaryldy, dep habarlaidy "Ult aqparat" ákimdikke silteme jasap.
Túrkistan oblysynda avariialyq qutqarý jumystarynyń nátijesinde kóligimen jolda qalyp qoiǵan (17 aýyr júk kóligi, 90 jeńil avtokólik) 377 adam qutqaryldy. Onyń ishinde 75-i balalar. Bul jóninde Tótenshe jaǵdailar departamentiniń basqarma bastyǵy Talǵat Dosaliev Óńirlik kommýnikatsiialar qyzmetinde ótken brifingte málimdedi.
Tabiǵi qubylysqa bailanysty Departamentte shuǵyl shtab qurylǵan. Óńirde respýblikalyq mańyzdaǵy avtomobil joldarynyń 2 ýchaskesi jáne oblystyq mańyzdaǵy avtomobil joldarynyń 7 ýchaskesinde kólikterdiń júrýine shekteý qoiylǵan.
«Ótken aptanyń sońǵy kúnderi jel men jaýǵan qar saldarynan Túrkistan, Kentaý qalalary men Tólebi, Qazyǵurt, Ordabasy, Otyrar, Sozaq, Túlkibas, Sairam aýdandarynda 34 773 abonent elektr jaryǵynsyz qaldy. Qalpyna keltirý jumystaryna jalpy 20 brigada, 65 jeke quram, 18 birlik tehnika jumyldyrylǵan. Degenmen, qarly boran saldarynan zardap shekkender joq. Oblys turǵyndary eger aýa raiy qolaisyz bolǵan jaǵdaida jolǵa shyqpaǵany abzal», - Dosaliev.
Sonymen qatar, baspasóz máslihatynda sóz alǵan «Ońtústik jaryq tranzit» JShS-ń bas direktorynyń orynbasary Erlan Meldebekovtyń aitýynsha, Túrkistan qalasyn jaryqpen qaita qamtý úshin 65 maman kúni-túni jumys istegen. Búgingi tańda shaharda 100% jaryq bar. Negizinen, qalada 900-den astam transformator bolsa, onyń 165-i ǵana atalǵan mekeme qaramaǵynda. Qalǵan transformatorlar qalalyq infraqurylym bólimi men jeke azamattarǵa tiesili.
