Túrkistan oblysynda infektsiialyq aýrýlardy juqtyrǵan naýqastar sany azaimai tur. Sondyqtan óńirde karantin rejimi jaǵdai turaqtanǵansha jalǵasady. Bul týraly Óńirlik kommýnikatsiialar qyzmetinde ótken brifingte Túrkistan oblysy Taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Aldarqul Ahmetov málimdedi.
Oblysta bazarlardyń jumys rejimi dúisenbi-juma kúnderi saǵat 10.00-den 16.00-ge deiin, al qoǵamdyq tamaqtaný nysandarynyń (50 orynǵa deiin) jumysy dúisenbi-juma kúnderi saǵat 10.00-den 21.00-ge deiin shektelgen. Bul nysandarǵa senbi-jeksenbi kúni jumys isteýge tyiym salynyp otyr.
«Sulýlyq salondarynyń, shashtarazdardyń jumys ýaqyty tańǵy 10.00-den keshki 20.00-ge deiin shekteldi. Qonaq úiler men sanatoriialardy qospaǵanda, halyqqa qyzmet kórsetý salasyndaǵy týrizm obektileri men uiymdarynyń (demalys úileri, týristik bazalar, basseinder, jaǵajailar) qyzmetine, mektepke deiingi uiymdardaǵy kezekshi toptardyń jumysyna, bilim berý ortalyqtarynyń, úiirmeler men balalar túzetý kabinetteriniń jumysyna tyiym salyndy. Qala ishindegi qoǵamdyq kóliktiń jumysy sanitarlyq-dezinfektsiialyq rejimdi kúsheite otyryp, jumys kúnderi tańǵy saǵat 06.00-den 10.00-ge deiin jáne keshki saǵat 17.00-den 21.00-ge deiin shekteldi. Al senbi-jeksenbi kúnderi qoǵamdyq kólikterdiń jumysy toqtatylady», - dedi Aldarqul Raiymqululy.
Sonymen qatar, jumys kúnderi sýpermarketter men minimarketter jáne úidiń janyndaǵy dúkender saǵat 10.00-den 20.00-ge deiin, demalys kúnderi saǵat 10.00-den 18.00-ge deiin qyzmet kórsetýi tiis. Saýda salasynda sonyń ishinde pisken taǵamdardy, fastfýd, balmuzdaq, sýsyn satatyn dúńgirshikter tek jumys kúnderi ýaqyt shekteýimen (dúisenbi-juma) saǵat 10.00-den 18.00-ge deiin qyzmet kórsetetin bolady.
Menshik nysanyna qaramastan barlyq uiymdarda adam kóp jinalatyn jinalystar, keńester, konferentsiialar, forýmdar, seminarlar jáne basqa da is-sharalardy ótkizýge tyiym salyndy.
