Túrkistan oblysy qoǵamdyq damý basqarmasy «Qoǵamdyq kelisim» KMM-niń uiymdastyrýymen Qazyǵurt jáne Ordabasy aýdandarynda «Etnosaralyq qaqtyǵystardyń aldyn alý jolynda onyń mehanizmi men algoritmin qalyptastyrý» taqyrybynda seminar ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
El birligin bekemdegen jiyn aldymen Qazyǵurt aýdanynda uiymdastyryldy. Seminarǵa Túrkistan oblysy prokýrorynyń orynbasary Saian Keldibekov, Qazyǵurt aýdanynyń ákimi Arman Abdýllaev, QR UQK Túrkistan oblystyq departamenti bastyǵynyń orynbasary Bahtiiar Mametbakiev, Túrkistan oblysy Politsiia Departamenti Jergilikti politsiia qyzmeti basqarmasynyń bastyǵy Asylhan Tórehanov qatysty. Sondai-aq jiynda UQK-niń Túrkistan oblysy boiynsha departamentiniń, quqyq qorǵaý organdarynyń ókilderi, jergilikti atqarýshy biliktiń ideologiia boiynsha jaýapty qyzmetkerleri, belgili ǵalymdar, sarapshylar boldy.
Seminarǵa moderatorlyq etken Túrkistan oblystyq qoǵamdyq damý basqarmasynyń basshysy Ańsar Óserbaev basqosýdyń mańyzdylyǵyna toqtalyp, kún tártibindegi máselelermen tanystyrdy.
«Memleket basshysy Qasym-Jomart Toqaev óz Joldaýynda el birligin nyǵaita túsý qajettigine airyqsha mán berdi. Bul baǵytta quqyq qorǵaý jáne jergilikti atqarýshy organdarǵa artylatyn senim júgi aýyr. Biz birlese atqarǵan jumystar arqyly qoǵamnyń tatýlyǵy men birligin, qoǵamnyń qaýipsizdigi men tynyshtyǵyn qamtamasyz ete alamyz. Áleýmettik jáne etnosaralyq qaqtyǵystardy eńserý, olardyń aldyn alý men boldyrmaý jónindegi jumys bizdiń qyzmetimizdiń negizgi baǵyttarynyń biri bolyp qala beredi. Ol siz ben bizge ortaq mindet dep bilemin. Sol úshin de kúsh salyp, birlese jumys jasaýǵa shaqyramyn», - dedi Ańsar Jańabaiuly.
Seminarda Q.A.Iasaýi atyndaǵy HQTÝ-niń teologiia fakýltetiniń dekany f.ǵ.d, professor Dosai Kenjetai, QR UQK Túrkistan oblysy boiynsha departamentiniń basqarma basshysy Janǵali Ýrýnbaev, OQMPÝ-dyń «Rýhani jańǵyrý» jáne tárbie bólimi basshysy, tarih ǵylymdarynyń kandidaty Qairat Anarbaev baiandama jasady. Baiandamalar oqylyp bolǵan soń, usynystar men pikirler tyńdaldy.
Mańyzdy seminar Qazyǵurttan soń Ordabasy aýdanynda jalǵasty. Onda etnosaralyq tatýlyqty saqtaý, qoǵamdyq kelisimdi nyǵaitý, daý-damaidyń aldyn alý baǵytynda keleli oilar aityldy.
Seminardy qorytyndylaǵan oblystyq qoǵamdyq damý basqarmasynyń basshysy A.Óserbaev óńirdegi etnosaralyq shielenistiń aldyn alýǵa negizdelgen is-sharalar turaqty túrde jalǵasatyndyǵyn aityp, bul baǵyttaǵy jumystardy birlese atqarýǵa shaqyrdy.
