Qaiǵyly oqiǵa 22 shilde kúni Túrkistan oblysy Túlkibas aýdanyna qarasty Aqsý-Jabaǵyly aýylynda bolǵan, dep habarlaidy ult.kz.
Oblystyq Tótenshe jaǵdailar departamentiniń málimetinshe, 2024 jyly týǵan búldirshin turǵyn úidiń aýlasynda eresekterdiń qaraýynsyz qalyp qoiǵan. Aldyn ala derek boiynsha, bala abaisyzda tereńdigi shamamen 2,5 metr bolatyn syrtqy ájethanaǵa qulap ketken.
Oqiǵa ornyna qutqarýshylarmen birge jedel járdem qyzmeti, politsiia, jergilikti atqarýshy organ ókilderi jáne orman sharýashylyǵynyń mamandary jumyldyryldy. Qutqarýshylar balanyń denesin ájethanadan alyp shyqqan. Qazirgi ýaqytta oqiǵanyń barlyq mán-jaiyn anyqtaý maqsatynda tiisti tekserý jumystary júrgizilip jatyr.
Aita keteiik, buǵan deiin Túrkistan oblysynda balalardyń qaraýsyz qalýy saldarynan sý aidyndarynda segiz jazataiym oqiǵa tirkelgeni habarlanǵan bolatyn.
