Túrkistan oblysynyń aýdan, qalalarynda oblys ákimi Janseiit Túimebaevtyń arnaiy tapsyrmasyna sáikes, halyqqa mádeni, rýhani, dini turǵyda túsindirý jumystaryn júrgizý maqsatynda «Dástúrli qundylyqtar kerýeni» taqyrybyndaǵy kóshpeli jiyndar ótip jatyr.
Búginge deiin óńirimizdiń Arys qalasy men Saryaǵash, Maqtaaral, Jetisai, Keles, Shardara, Qazyǵurt jəne Tólebi aýdandarynda uiymdastyrylǵan sharaǵa oblysymyzǵa tanymal dintanýshy-teologtar, bedeldi sportshylar, mádeniet maitalmandary men ziialy qaýym ókilderi, Qazaqstan musylmandary dini basqarmasynyń oblystyq filialdarynyń imamdary jáne ózge de sala ókilderi qatysty.
Máselen, Arys qalasynda ótken jiyndy qala ákiminiń orynbasary Rysdáýlet Aitbaev júrgizip, shahardaǵy dini ahýal jaily keńinen aityp berdi. Aitýynsha, búgingi tańda Arysta «Dini qyzmet jáne dini birlestikter týraly» qabyldanǵan Zańǵa sáikes tirkelip jumys istep jatqan dini konfessiialardyń jalpy sany – 2. Olar: Islamdyq jáne Hristiandyq baǵytta. Qala aýmaǵyndaǵy dini birlestikter men filialdar – 27. Onyń ishinde: 1-prihod («Shymkent qalasynyń Arys qalasyndaǵy Bojiei Materi qazan ikonasy prihody» jergilikti pravoslavielik dini birlestigi) pravoslavtyq baǵytta bolsa, Qazaqstan musylmandar dini basqarmasyna qarasty 26 meshit jumys isteidi. Olardyń barlyǵymen tyǵyz bailanys ornatylǵan. Jalpy alǵanda, qala aýmaǵynda dini ahýal turaqty.
"Dástúrli qundylyqtarǵa qart adamdardyń jas otbasyǵa bergen aqyl-keńesteri jatady. Ár otbasyda bul qundylyqtar ár túrli. Olardyń uqsas jaqtary da bar. Kez kelgen otbasyda dindi saqtap, nekeni buzbaý, urpaq jalǵastyryp, bala tárbieleý syndy ortaq dástúrli otbasylyq qundylyqtar qalyptasqan. Árbir otbasynyń basty maqsaty baqytty ǵumyr keshý bolyp tabylady. Baqytty otbasyn qurý birinshi kezekte jas jubailardyń tárbiesine tikelei bailanysty. «Balapan uiasynda ne kórse, ushqanda sony iledi» dep qazaq halqy otbasy tərbiesine airyqsha mən bergen. Memlekettiń basty mindeti men maqsaty da osy dástúrli qundylyqtarymyzdy saqtap, óskeleń urpaqqa izgilik jolyn dəripteý. Sol mindetimizdi oryndaý maqsatynda atalǵan kerýendi uiymdastyryp, pikir almasýǵa kelip otyrǵan azamattarǵa alǵysymdy bildiremin", - dedi qala ákiminiń orynbasary.
Jergilikti halyqpen kezdesýde Túrkistan oblysy din isteri basqarmasy «Din máselelerin zertteý ortalyǵy» MKM-niń direktorynyń orynbasary Mədi Besbaev, Túrkistan oblysy din isteri basqarmasy, «Din máselelerin zertteý ortalyǵy» memlekettik kommýnaldyq mekemesiniń bólim basshysy Dálelhan Ospanov, Oblystyq mádeniet jáne tilderdi damytý basqarmasy, Halyq shyǵarmashylyǵy ortalyǵynyń bólim basshysy Sholpan Mamythanova, Arys qalasynyń «Yrys aldy-yntymaq» qoǵamdyq forýmynyń hatshysy, kásibi emes mediator, qalanyń qurmetti azamaty Qonys Balqybekov, qalalyq Janar Baiǵýttieva atyndaǵy óner mektebi direktorynyń orynbasary Temirhan Ábdikovter sóz alyp, basqosýdyń mańyzdylyǵyna toqtaldy. Jiynǵa qatysýshylar tarapynan baiandamashylarǵa suraqtar qoiylyp, tushymdy jaýaptar alyndy.
