Túrkistan oblysynda boranda jolda turyp qalǵan tehnikalar men jolaýshylar qutqaryldy. Oblystyq TJD Órt sóndirý qyzmetiniń kúshimen Jambyl oblysy Amangeldi aýylynyń janynda tas jol boiynda turyp qalǵan 3 tehnika shyǵarylyp, 11 adam evakýatsiialandy, dep habarlaidy QazAqparat tilshisi.
Oblystyq TJD málimetinshe, keshe Jambyl oblysynda aýa raiynyń buzylýyna bailanysty keshki saǵat 19:20-dan bastap «Almaty-Tashkent-Termez» respýblikalyq mańyzy bar avtokólik jolynyń 593-632 shaqyrymynda (Túlkibas aýdany Jaskeshý aýylynan Jambyl oblysynyń shekarasyna deiin) barlyq avtokólik túrlerine jol qozǵalysy jabylǵan bolatyn.
Al, búgin túngi saǵat 01.50-de atalǵan ýchaskede barlyq avtokólik túrlerine jol qozǵalysy ashyldy. Degenmen jol boiynda kezekshilik etken tótenshe jaǵdailar qyzmetiniń ókilderi shekteý kezinde Túlkibas aýdanynyń Jambyl oblysymen shekarasynda 40 tehnika, 135 adam jol boiynda turǵandaryn baiqaǵan. Alaida bul jolaýshylar kómekke muqtaj emestigin, tek joldyń ashylýyn kútip jatqanyn aitqan.
Soǵan qaramastan respýblikalyq mańyzy bar avtokólik jolynda 4 jylytý beketi - Túlkibas aýdany Shaqpaq aýylynda - 2, T.Rysqulov aýylynda - 2 aldyn ala daiyndalǵan. Budan bólek avarialyq-qutqarý jáne kezek kúttirmeitin jumystarǵa Túrkistan oblysy TJ departamentiniń, jergilikti atqarýshy organdarynyń, jergilikti politsiia qyzmetiniń jáne Qazavtojoldan jalpy 29 adam, 13 tehnika jumyldyrylǵan.
