Túrkistan oblysynda enesi de, kelini de, qyzdary da kópbalaly otbasy turady. Jetisai aýdanyna qarasty Jylysý aýylyndaǵy Súttibaevtar otbasyn aýyl jurty kópke úlgili januia retinde jaqsy tanidy, dep habarlaidy QazAqparat.
Biyl 80-ge kelgen otanasy Záýre áje 13 qursaq kóterip, 11 balany tárbielep jetkizgen.
Batyr ananyń qyzdary men kelinderi qart ananyń jolyn qýǵan. Sondyqtan bul otbasy aýyl ishinde erekshe qurmetke bólengen.
Shańyraqtyń uiytqysy bolǵan Záýre áje bul áýletke 15 jasynda kelin bolyp túskenin aitady.
Alaida otaǵasy úidiń jalǵyz balasy bolǵandyqtan, perzentteriniń kóp bolǵanyn armandaǵan.
Jas kezinde ata-enesine de qarap, eriniń de jaǵdaiyn jasap, bala-shaǵasyn da baǵyp, bárine úlgerýge tyrysqan. Ózi ata-anasyz jetim óskendikten jastaiynan beinetti de kóp kórgen.
Balalarynyń keibirin úide bosansa, bireýin at arbanyń ústinde, qalǵandaryn perzenthanaǵa jumystan jaiaý baryp bosanǵan eken.
«Kishkentaiymnan kelip qara jumys istedim. Jaiaý kelip egiz de týdym, jalqy da týdym. Qudaidyń bergen 13 balasyn týdym, sonyń 11 bar. Áýeli Alla, odan keiin ata-enemniń arqasynda jettim bárine. Qyzym deýshi edi meni. Bir balam ekeý boldy dep, mynaý bala ómirge kelgen jylap ta aldy. Men ár bosanǵan saiyn qýanatyn. Sóitim júrip ósip-óndik», - deidi batyr ana.
«Alma aǵashynan alysqa túspeidi» demekshi, bul áýlettiń qyzdary men kelinderi de qariianyń jolyn jalǵap, kópbalaly otbasyna ainalǵan.
Záýre áje qazir bes qyz, alty balasynan 75 nemere men 26 shóbere, 6 shópshek súiip otyr. Qolyndaǵy kishi kelini Saparkúl de kópbalaly ana atanǵan.
«Bul áýletke altynshy kelin bolyp tústim. Aldymda 6 abysynym, bes qaiynaǵam bar. Sol kisilerdiń jolymen, eń aldymen enemniń tárbiesin alyp kelemin. Úiretkenderin ómirimde paidalanyp, qoldanyp kelemin. Enemniń aqyly - úlken mektep. Toi-tomalaq bolsa, bir toidyń qyzmetin ózimiz-aq atqaryp tastaimyz»,- deidi Saparkúl Shorabekova.
Aita keteiik, Jetisai aýdanynda Súttibaevtar áýleti siiaqty 16 myńǵa jýyq kópbalaly otbasy turady.
Onyń ishinde 18 jasqa deiingi balasy bar analardyń sany - 8 myńǵa jýyq.
Budan bólek, 369 batyr ana, 1700-ge jýyq altyn, 5 myńnan asa kúmis alqa iegerleri bar. Al, 749 ana 1,2 dárejeli Ana Dańqy ordenderimen marapattalǵan.
