Foto: Túrkistan oblysy ákiminiń baspasóz qyzmeti
Túrkistan oblysynyń ákimi Darhan Satybaldynyń tapsyrmasyna sáikes, óńirde balyq sharýashylyǵyn damytý baǵytynda seminarlar ótkizilýde. Osy rette Túrkistan oblysy, Báidibek aýdanynda ornalasqan «Shoq-Talap» sharýa qojalyǵynda balyq sharýashylyǵymen ainalysýǵa nietti turǵyndar úshin arnaiy seminar uiymdastyryldy, dep habarlaidy «Ult aqparat».
Biyl jańadan ashylǵan sharýa qojalyǵynyń jumystarymen tanysý jáne aldaǵy ýaqytta balyq sharýashylyǵyn ashýǵa qyzyǵýshylyq tanytqan kásipkerlermen tájiribe almasý maqsatynda ótken seminarǵa aýdan ákimi Erlan Nurmahanov, Túrkistan oblysynyń tabiǵi resýrstar jáne tabiǵat paidalanýdy retteý basqarmasynyń bas mamany Abai Sádirhoja qatysty.
«Shoq-Talap» sharýa qojalyǵynyń tóraǵasy Baqyt Omarbekov biyl 2 ga aýmaqqa jasandy kól jasap, 1600 dana sazan shabaǵyn jibergenin aityp, ózenderdiń jaǵalaýynan jasandy kól jasaýǵa ruqsat alý basty maqsat ekenin jetkizdi. Sonymen qosa jeke kásipker Abzal Arynbekov Shaian ózeni ańǵarynan ózine uzaq merzimge berilgen jer telimin paidalaný úshin qandai jumystar atqarylý kerektigin surasa, Boraldai aýyldyq okrýginen JK «Haidar Radmir» 2 ga aýmaq jasandy kólge afrikalyq somnyń 10 myń shabaǵy jáne 1 myń sazan jiberilgendigi jaily málimetimen bólise kele qazirgi tańda balyqtyń daiyn azyǵynyń tym qymbattyǵynan sharýalar qoldan daiyndalǵan azyqty (korm) paidalanyp jatqandyǵyn atap ótti.
Óz kezeginde Túrkistan oblysynyń tabiǵi resýrstar jáne tabiǵat paidalanýdy retteý basqarmasynyń bas mamany Abai Sádirhoja balyq sharýashylyǵy boiynsha kásipti qalai bastaý kerek, qandai jeńildikter qarastyrylǵan jáne bastaǵan isti qalai keńeitip, damytý kerektigi jaiynda keńinen túsindirip ótti. Seminarǵa qatysýshylar ózderin tolǵandyrǵan suraqtaryn qoiyp, sáikesinshe tushymdy jaýaptar aldy.
Búginde Túrkistan oblysynda balyq sharýashylyǵymen ainalysýshylardyń qatary kóbeiip keledi. Qazirgi tańda óńirde taýarlyq balyq ómirýmen ainalysatyn sharýashylyqtardyń sany 200-den asty.
