Foto: Gov.kz.
Túrkistan oblysynda gektarlap alma baq egip, jemis-jidek baǵytyna betburys jasaǵandar kóbeiip keledi. Oblystyq aýyl sharýashylyǵy basqarmasynyń málimetinshe, oblys boiynsha jemis-jidek aǵashtary 17,9 myń gektarǵa, onyń ishinde 5,4 myń gektar qarqyndy alma baýy ornalastyrylǵan. Óńirde alma, almurt, órik, shie, shabdaly, qara órik ósiriledi, dep habarlaidy «Ult aqparat».
Bul eldegi jemis-jidek aǵashtarynyń 43% quraidy. Dástúrli baýlardan gektaryna 60-70 tsentnerden ónim alynsa, qarqyndy baýlardan 300-350 tsentnerden ónim jinaldy. Qarqyndy baýlardyń negizgi bóligi Túlkibas, Tólebi, Qazyǵurt, Sairam aýdandarynda ornalasqan.
Ótken jyly jemis salý jasyndaǵy jemis-jidek aǵashtarynan 116,9 myń tn (95,8 myń tn alma, 3,6 myń tn almurt, 7,4 myń tn sary órik, 4,2 myń tn shie, 2,4 myń tn shabdaly, 3,3 myń tn qara órik, 1,8 myń tn jidekter) ónimi jinaldy. Búgingi kúnge 26 myń tn Resei, Qyrǵyzstan, Belorýssiia, Ózbekstan elderine eksporttaldy.
Oblysta qarqyndy baý sharýashylyǵyn damytý bul baǵytqa investorlar tartý jumystary turaqty júrgizilýde.
Jemis-jidek aǵashtaryn ósirýge kelesidei memlekettik qoldaýlar kórsetiledi.
«Tyńaitqyshtardyń qunyn sýbsidiialaý» baǵdarlamasy boiynsha satyp alynǵan mineraldy tyńaitqyshtardyń 50%;
«Pestitsidter, gerbitsidter men bioagentterdiń qunyn sýbsidiialaý» boiynsha ziiandy organizmderge qarsy qoldanylatyn preperattardyń 50% ;
«Investitsiialyq salymdar kezinde agroónerkásiptik keshen sýbektisi shekken shyǵystardyń bir bóligin óteý boiynsha sýbsidiialaý» baǵdarlamasyna sáikes 5 gektardan bastap qarqyndy alma baǵyn salýǵa jumsalǵan shyǵynnyń 40% (1 gektarǵa esepteletin barynsha quny 21 000,0 myń teńge) jáne 5 gektardan bastap jemis-jidek baǵyn otyrǵyzýǵa jumsaǵan shyǵynnyń 25% ;
Sonymen qatar tuqym sharýashylyǵyn qoldaý baǵdarlamasy arqyly satyp alynǵan kóshetteriniń 50% sýbsidiialanady.
