Túrkistan qalasynda oblys ákimi Ómirzaq Shókeevtiń tóraǵalyǵymen kezekti apparat májilisi ótti. Jiynda ataýly áleýmettik kómek kórsetýdegi sońǵy málimetter men bul tusta oryn alǵan olqylyqtar talqylandy, dep habarlaidy "Ult aqparat" oblys ákiminiń baspasóz qyzmetine silteme jasap.
Májilis otyrysynda Túrkistan oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Ásiia Temirbaeva baiandama jasady.
«Sońǵy málimetterge sáikes, oblys halqynyń sany - 2 011 628 adam (344 myń otbasy), onyń ishinde 86,6 myń kópbalaly otbasy bar. Ataýly áleýmettik kómek kórsetý barysynda belgilengen nysanaly indikatordyń biri – kúnkóris deńgeiinen tómen turatyn halyqtyń úlesi 16,5% bolyp belgilengen. Biyl oblys boiynsha AÁK kórsetý maqsatynda jalpy 70,8 mlrd teńge bólingen. Onyń ishinde respýblikalyq biýdjettiń úlesi - 65,7 mlrd teńge. Ataýly áleýmettik kómek 100 myńnan astam otbasyndaǵy 632,8 myń adamǵa taǵaiyndaldy. Bul ótken jylmen salystyrǵanda úsh ese kóp» delingen habarlamada.
Bul másele tóńireginde oryn alǵan olqylyqtarǵa qaita esepteýdiń ýaqytyly júrgizilmeýi, qujattardyń der kezinde óńdelmeýi, biýdjet qarjysynyń durys josparlanbaýy (Ordabasy, Kentaý, Túrkistan) jáne aldyn ala bir jyldyq AÁK tólenýi (Kentaý qalasy) sebep bolǵan.
«Osyǵan bailanysty aýdan, qala ákimderi jyl sońyna deiin qarjynyń maqsatty jáne zań sheńberinde tólenýin jete baqylaýǵa alyp, qaita eseptep, bólingen qarajatty maqsatty igerip, AÁK alýshylardy jumyspen qamtýdyń belsendi sharalaryna tartý qajet. Ataýly áleýmettik kómek kórsetý máselesi – halyq arasynda udaiy talqylanyp, synǵa ilikken másele boldy», - dedi oblys basshysy.
Aimaq basshysynyń tapsyrmasyn osy joly oryndaýdan taiqyǵandar kreslomen birjolata qoshtasatyn bolady. Ómirzaq Estaiuly osyny qatań eskertti.
«Bul - óte mańyzdy másele. Júiesi joq jumystan shikilik shyǵady. Oǵan jol bergen jaýaptylardyń kinásin naqty faktimen dáleldep, jazalaimyz. Qazir tyń ideiasy men aqyly bar mamandardy ańdyǵan zaman. Zamanaýi tehnologiianyń tilin igergen, ideialy tulǵalardy jumysqa tartyńdar», - dedi aimaq basshysy jinalys barysynda.
Basqarma basshylyǵy áleýmettik shielenisterdiń bolýyna jol bergen, tiisti jumyspen qamtý jumystaryn júrgizbegen jumyspen qamtý ortalyqtarynyń basshylarynyń jumystan bosatylýyn, tiisti jaýapty mamandardyń oryndaýshylyq tártibin qaraýdy usyndy. Aýyl ákimderiniń, jumyspen qamtý ortalyqtary men bólim mamandarynyń biliktiligin anyqtaý maqsatynda jeltoqsan-qańtar ailarynda testileý jumysy júrgizilmek.
