Foto: Gov.kz.
Biylǵy 9 aidyń nátijesimen Túrkistan oblysynyń áleýmettik-ekonomikalyq damýynyń negizgi salalarynda oń dinamika saqtaldy. Aldyn ala esep boiynsha jalpy óńirlik ónim kólemi 3,7 trln. teńgeni, al qysqa merzimdi ekonomikalyq ósim 110,6%-dy qurady. Sonymen birge aimaqta kiris kózderi ulǵaiǵan, dep habarlaidy Ult.kz.
Atalǵan máseleler oblys ákimi apparatynyń aptalyq májilisinde talqylandy. Túrkistan oblysynyń ákimi Darhan Satybaldy indikatorlardy tolyq oryndaý mańyzdy ekenine taǵy da toqtaldy.
– Bekitilgen jospardy oryndap, ekonomikalyq ósimge qol jetkizýimiz kerek. Jumys bar. Biraq áli de kúsheitken jón. Indikatorlardy oryndaý kórsetkishi tómen aýdan, qala ákimderinen tiisti túsiniktemesi alynady. Óndiris oryndaryn ashý, ózindik kiristerdi kóbeitý qajet. Izdenińizder, kórshiles elderge baryp, tájiribelerin kórińizder. Bizge jumys oryndaryn, kásiporyndar ashý boiynsha naqty nátije qajet. Biýdjet qarjysyn tiimdi jumsaý, aimaqtaǵy jobalardy ýaqtyly júzege asyrý da qatań qadaǵalanady, – dedi Darhan Satybaldy.
Májiliste Túrkistan oblysynyń ekonomika jáne biýdjettik josparlaý basqarmasynyń basshysy Qanat Qaiypbek pen Oblystyq qarjy jáne memlekettik aktivter basqarmasynyń basshysy Qairat Elibaevtyń esepteri tyńdaldy.
Jyl basynan beri óńirde ónerkásip ónim kólemi 857,1 mlrd. teńgeni qurap, ósim 106,8% deńgeiinde boldy. Ósýdiń oń úrdisi taý-ken, mashina jasaý, jeńil ónerkásip, tamaq ónimderi, jihaz óndirisinde salalarynda baiqalady. Óńdeý ónerkásibi ónimi naqty 409 mlrd. teńgeni qurap, 2 esege artqan. Aýyl sharýashylyǵy ónim kólemi 747,3 mlrd. teńgeni qurap, óńir respýblikada kósh bastady. Negizgi kapitalǵa baǵyttalǵan investitsiia kólemi 822,3 mlrd. teńgege jetip, artyǵymen oryndalǵan.
2024 jylǵy 3-shi toqsan qorytyndysymen biýdjetke 181 mlrd. 200 mln. teńge salyqtar men basqa da túsimder túsip, jospar 103,6%-ǵa oryndalyp otyr. Aimaqta óndiris oryndaryn ashý, salyq mádenietin kóterý, ózindik kiris kózderin ulǵaitý baǵytyndaǵy jumystar jalǵasady.
