Túrkistan oblysy «Diplommen aýylǵa» baǵdarlamasyn júzege asyrýda kósh bastap tur. Ótken jyly óńirde 700-ge jýyq jas maman aýyldyq jerlerge baryp, jumysqa ornalasqan. Biyl qyzmetke kirisken 863 mamannyń 314-i baspanaly boldy, dep habarlaidy "Ult aqparat" Habar 24 agenttigine silteme jasap.
Kentaý aýdanynda da osy joba aiasynda jumysqa turyp, tirshiligin túzegen jastar az emes. Sonymen qatar, aýdandaǵy jastar ortalyǵy da jastarǵa baǵyt-baǵdar berip otyrady. Bul - Baiyldyr aýyldyq okrýginiń mádeniet úii. Klýb meńgerýshisi Gúlnur Dúisenbieva aýyl balalaryna sahnada óner kórsetýdiń qyr-syryn úiretip jatyr. Jas maman - Otyrar aýdanynyń týmasy. Túrkistandaǵy Qoja Ahmet Iasaýi atyndaǵy halyqaralyq qazaq-túrik ýniversitetin akterlik óner mamandyǵy boiynsha bitirgen. Joldasy ekeýi «Diplommen aýylǵa» baǵdarlamasymen osynda kelip jumysqa ornalasypty. Qazir eki balanyń anasy óz jumysyna dán riza.
«Qudaiǵa shúkir, baspanam bar, jumysym bar. Aýyldaǵy jas búldirshinderge sabaq beremin. Ózime osy jumysym unaidy. Osy baǵdarlamanyń shyqqanyna úlken raqmet aitamyn. Jastarǵa aitarym, qoldaryna diplomdaryn alsa, men siiaqty aýylǵa kelip jumys istesin, men siiaqty baspanaly bolsyn», - deidi Baiyldyr aýyldyq okrýginiń turǵyny Gúlnur Dúisenbieva.
Búginde Kentaý qalalyq Jastar ortalyǵy jastardyń jii bas qosatyn ornyna ainalǵan. Munda Elbasynyń «Tsifrly Qazaqstan» baǵdarlamasyn jastarǵa keńinen nasihattaý maqsatynda «elektrondy úkimet» júiesi engizilgen. Jastar ózderine qajetti barlyq aqparatty osy jerden kelip alady.
Jalpy, ortalyqta jastarǵa qyzmet kórsetý úshin barlyq jaǵdai jasalǵan. Máselen, belgili kásipkerlerdiń qatysýymen jastardy kásipkerlikke baýlyp, kepilsiz nesie berýge baǵyttalǵan túrli seminar-treningter ótip turady. Sonymen qatar jastardy soltústikke qonys aýdaryp, sonda qalyp jumys isteýge nasihattaityn bos jumys oryndarynyń jármeńkesi uiymdastyrylady.
«Búgingi tańda jastarǵa ne qajet? Ol - jastar arasynda quqyq buzýshylyq pen qylmystyń aldyn alý maqsatynda bos ýaqytyn qalai ótkizedi, soǵan jastardy beiimdeý. Ekinshisi, bizdiń memlekettik baǵdarlamamyz bar, iaǵni jastar kóbine turǵyn úi, qoljetimdi baspana, «Diplommen aýylǵa», «Serpin» baǵdarlamasyna qatysty keńes beremiz. Toǵyzqumalaq úiirmeleri, ulttyq qundylyqtar, ulttyq oiyndarymyzdy qaita jańǵyrtý maqsatynda túrli úiirmeler jumys isteidi», - deidi Kentaý qalalyq jastar ortalyǵynyń jetekshisi Qanat Bekmetov.
Sondai-aq, aldaǵy 2019 jyl - Jastar jyly bolǵandyqtan, olardy jumyspen qamtyp, sapaly bilim alýyna baǵyttalǵan keshendi jumys jospary bekitilgen. Qala ákiminiń qoldaýymen sport alańdary da ashylǵan.
Jalpy, Túrkistan oblysynda bes júz myńnan asa jas bar. Bul - oblys halqynyń 26 paiyzy. «Serpin-2050» jobasy aiasynda 1 589 jas soltústik óńirlerde bilim alyp jatyr.
