تٷركٸستان وبلىسى «ديپلوممەن اۋىلعا» باعدارلاماسىن جٷزەگە اسىرۋدا كٶش باستاپ تۇر. ٶتكەن جىلى ٶڭٸردە 700-گە جۋىق جاس مامان اۋىلدىق جەرلەرگە بارىپ, جۇمىسقا ورنالاسقان. بيىل قىزمەتكە كٸرٸسكەن 863 ماماننىڭ 314-ٸ باسپانالى بولدى, دەپ حابارلايدى "ۇلت اقپارات" حابار 24 اگەنتتٸگٸنە سٸلتەمە جاساپ.
كەنتاۋ اۋدانىندا دا وسى جوبا اياسىندا جۇمىسقا تۇرىپ, تٸرشٸلٸگٸن تٷزەگەن جاستار از ەمەس. سونىمەن قاتار, اۋدانداعى جاستار ورتالىعى دا جاستارعا باعىت-باعدار بەرٸپ وتىرادى. بۇل - بايىلدىر اۋىلدىق وكرۋگٸنٸڭ مەدەنيەت ٷيٸ. كلۋب مەڭگەرۋشٸسٸ گٷلنۇر دٷيسەنبيەۆا اۋىل بالالارىنا ساحنادا ٶنەر كٶرسەتۋدٸڭ قىر-سىرىن ٷيرەتٸپ جاتىر. جاس مامان - وتىرار اۋدانىنىڭ تۋماسى. تٷركٸستانداعى قوجا احمەت ياساۋي اتىنداعى حالىقارالىق قازاق-تٷرٸك ۋنيۆەرسيتەتٸن اكتەرلٸك ٶنەر ماماندىعى بويىنشا بٸتٸرگەن. جولداسى ەكەۋٸ «ديپلوممەن اۋىلعا» باعدارلاماسىمەن وسىندا كەلٸپ جۇمىسقا ورنالاسىپتى. قازٸر ەكٸ بالانىڭ اناسى ٶز جۇمىسىنا دەن ريزا.
«قۇدايعا شٷكٸر, باسپانام بار, جۇمىسىم بار. اۋىلداعى جاس بٷلدٸرشٸندەرگە ساباق بەرەمٸن. ٶزٸمە وسى جۇمىسىم ۇنايدى. وسى باعدارلامانىڭ شىققانىنا ٷلكەن راقمەت ايتامىن. جاستارعا ايتارىم, قولدارىنا ديپلومدارىن السا, مەن سيياقتى اۋىلعا كەلٸپ جۇمىس ٸستەسٸن, مەن سيياقتى باسپانالى بولسىن», - دەيدٸ بايىلدىر اۋىلدىق وكرۋگٸنٸڭ تۇرعىنى گٷلنۇر دٷيسەنبيەۆا.
بٷگٸندە كەنتاۋ قالالىق جاستار ورتالىعى جاستاردىڭ جيٸ باس قوساتىن ورنىنا اينالعان. مۇندا ەلباسىنىڭ «تسيفرلى قازاقستان» باعدارلاماسىن جاستارعا كەڭٸنەن ناسيحاتتاۋ ماقساتىندا «ەلەكتروندى ٷكٸمەت» جٷيەسٸ ەنگٸزٸلگەن. جاستار ٶزدەرٸنە قاجەتتٸ بارلىق اقپاراتتى وسى جەردەن كەلٸپ الادى.
جالپى, ورتالىقتا جاستارعا قىزمەت كٶرسەتۋ ٷشٸن بارلىق جاعداي جاسالعان. مەسەلەن, بەلگٸلٸ كەسٸپكەرلەردٸڭ قاتىسۋىمەن جاستاردى كەسٸپكەرلٸككە باۋلىپ, كەپٸلسٸز نەسيە بەرۋگە باعىتتالعان تٷرلٸ سەمينار-ترەنينگتەر ٶتٸپ تۇرادى. سونىمەن قاتار جاستاردى سولتٷستٸككە قونىس اۋدارىپ, سوندا قالىپ جۇمىس ٸستەۋگە ناسيحاتتايتىن بوس جۇمىس ورىندارىنىڭ جەرمەڭكەسٸ ۇيىمداستىرىلادى.
«بٷگٸنگٸ تاڭدا جاستارعا نە قاجەت? ول - جاستار اراسىندا قۇقىق بۇزۋشىلىق پەن قىلمىستىڭ الدىن الۋ ماقساتىندا بوس ۋاقىتىن قالاي ٶتكٸزەدٸ, سوعان جاستاردى بەيٸمدەۋ. ەكٸنشٸسٸ, بٸزدٸڭ مەملەكەتتٸك باعدارلامامىز بار, ياعني جاستار كٶبٸنە تۇرعىن ٷي, قولجەتٸمدٸ باسپانا, «ديپلوممەن اۋىلعا», «سەرپٸن» باعدارلاماسىنا قاتىستى كەڭەس بەرەمٸز. توعىزقۇمالاق ٷيٸرمەلەرٸ, ۇلتتىق قۇندىلىقتار, ۇلتتىق ويىندارىمىزدى قايتا جاڭعىرتۋ ماقساتىندا تٷرلٸ ٷيٸرمەلەر جۇمىس ٸستەيدٸ», - دەيدٸ كەنتاۋ قالالىق جاستار ورتالىعىنىڭ جەتەكشٸسٸ قانات بەكمەتوۆ.
سونداي-اق, الداعى 2019 جىل - جاستار جىلى بولعاندىقتان, ولاردى جۇمىسپەن قامتىپ, ساپالى بٸلٸم الۋىنا باعىتتالعان كەشەندٸ جۇمىس جوسپارى بەكٸتٸلگەن. قالا ەكٸمٸنٸڭ قولداۋىمەن سپورت الاڭدارى دا اشىلعان.
جالپى, تٷركٸستان وبلىسىندا بەس جٷز مىڭنان اسا جاس بار. بۇل - وبلىس حالقىنىڭ 26 پايىزى. «سەرپٸن-2050» جوباسى اياسىندا 1 589 جاس سولتٷستٸك ٶڭٸرلەردە بٸلٸم الىپ جاتىر.
