Foto: Gov.kz.
Bul týraly Ortalyq kommýnikatsiialar qyzmetiniń alańynda oblystyń áleýmettik-ekonomikalyq damýy týraly esep berý barysynda Túrkistan oblysynyń ákimi Darhan Satybaldy málimdedi, dep habarlaidy «Ult aqparat».
– Bizdiń óńirdiń basty erekshiligi – halyqtyń 80 paiyzy aýyldarda turady. Sondyqtan da aýyl sharýashylyǵy – óńirdiń mańyzdy salasy. Biz aýyl sharýashylyǵyn ártaraptandyrý, sý únemdeý tehnologiialaryn engizý, mal men ósimdik ónimin tereń óńdeý baǵytynda jumys júrgizýdemiz. Ózderińizge belgili, elimizde jyl saiyn aǵyn sý tapshylyǵy baiqalady. Túrkistan oblysyna qajetti sýdyń 70 paiyzy kórshi memleketten keledi. Sondyqtan aýyl sharýashylyǵynda zamanaýi sý únemdeý tehnologiiasyn endirip, jańa daqyldar men sorttardy ósirýge basymdyq beremiz. Sý únemdeý tehnologiiasyn 216,3 myń gektarǵa engizip, sýarmaly jerlerdiń úlesin 40%-ǵa jetkizý josparymyz bar. Biyldyń ózinde bul tehnologiia jalpy 50 myń gektarǵa deiin jetkizildi. Sý únemdeý tehnologiialarynyń qoljetimdiligin arttyrý baǵyttynda jalpy quny 11,7 mlrd. teńgeni quraityn 3 óndiris oryndaryn ashtyq, – dedi Darhan Satybaldy.
Túrkistan oblysynda aýyl sharýashylyǵynda ónim kólemi 958 mlrd. teńgeni qurap, ósim 105,8 paiyzǵa jetti. Aýyl sharýashylyǵy ónim kólemi boiynsha oblys respýblikada jetekshi orynda tur. Bul baǵytta naryqty otandyq ónimdermen qamtamasyz etý maqsatynda 2024-2027 jyldarǵa jalpy 507 mlrd teńge bolatyn 105 jobany iske asyrý josparlanǵan. Osy arqyly 8 myńnan astam (8 346) jumys orny qalyptaspaq. Aimaqta «BNK Group LTD» kompaniiasynyń quny 7 mlrd. teńge quraityn «Jylyna 1000 dana jańbyrlatyp sýǵarý mashinalaryn shyǵarý» zaýyty, quny 4,1 mlrd. teńge bolatyn «14 myń gektar tamshylatyp sýarý óndirisi», «Turan sý» memlekettik kásipornynyń quny 650 mln. teńgeni quraityn jylyna 9 myń gektar tamshylatyp sýarý júiesin shyǵaratyn óndirisi tolyǵymen iske qosylǵan. Oǵan qosa sheteldik investordyń quny 2 mlrd. teńge bolatyn 40 myń gektarǵa tamshylatyp sýarý óndirisi kelesi jyly júzege asyrylady.
