Túrkistan oblysynda aýyldastarymen kezdeskennen keiin 32 jastaǵy er adam qaza tapty. Qaiǵyly oqiǵa 19 shilde kúni Túlkibas aýdanynda bolǵan, dep habarlaidy ult.kz.
Meiramhananyń beinebaqylaý kamerasyna túsip qalǵan jazbada bes er adamnyń Mahanbet Turǵanbekti aiaýsyz soqqyǵa jyqqany kórinedi. Marqumnyń týystarynyń aitýynsha, Mahanbetti tek qatty soqqyǵa jyǵyp qana qoimai, tamaǵyna pyshaq suǵyp, qansyrap jatqan kúiinde qaldyryp ketken.
Jaqyndarynyń sózinshe, tanystary keshki saǵat 22:00-den túngi 00:00-ge deiin oǵan birneshe ret qońyraý shalyp, kezdesýge shyǵýyn ótingen. Úiden shyqqannan keiin onymen bailanys úzilgen. Túngi saǵat 01:30 shamasynda otbasyna onyń qaza bolǵany týraly habar jetken.
Mahanbettiń jubaiy qaiǵyly oqiǵadan beri 11 kún ótse de, tek bir ǵana adamnyń qamaýǵa alynǵanyn aitady. Qalǵan kúdiktiler áli kúnge deiin bostandyqta júr. Onyń ústine, kisi óltirilgennen keiin olardyń biri marqumnyń telefonyna túsken qońyraýlarǵa jaýap bergen.
Marqumnyń artynda jubaiy men bes balasy qaldy. Úlken qyzy 11 jasta bolsa, kenje sábiine áli qyryq kún de tolmaǵan. Politsiia Qylmystyq kodekstiń 99-babynyń 1-bóligi («Adam óltirý») boiynsha qylmystyq is qozǵady. Alaida Túrkistan oblysy Politsiia departamenti bul oqiǵaǵa qatysty ázirge túsinikteme bergen joq.
