Qazaqstan Respýblikasy Tótenshe jaǵdailar ministri Túrkistan oblysynyń halqymen kezdesýde qabyldanyp jatqan órt qaýipsizdigi sharalary týraly aitty, dep habarlaidy «Ult aqaparat» ministrliktiń baspasóz qyzmetine silteme jasap.
2022 jyldyń 1 qazanynan bastap jylytý kezeńi bastaldy. Jylytý maýsymynda azamattardyń qaza bolý qaýpin azaitý úshin ministrlik birqatar shara qabyldady. Birinshi kezekte, respýblika boiynsha halyqtyń áleýmettik osal toptarynyń sanyn esepteý aiaqtaldy. Olar kópbalaly, az qamtylǵan otbasylar, zeinetkerler men múgedekter. Olarǵa keiin ataýly kómek kórsetiledi. Óńirde olardyń sany 25 myńnan asady.
Ekinshisi-jylytý maýsymy boiy júrgiziletin turǵyn úi sektoryndaǵy profilaktika. Munda azamattarǵa peshterdi, elektr jabdyqtaryn paidalaný, sondai-aq gaz jabdyqtary men ballondardy durys paidalaný jáne saqtaý boiynsha ádistemelik kómek kórsetiledi. Ministr bul rette ministrliktiń ádistemelik kómek kórsetetine basa nazar aýdardy.
Búgingi tańda qyzmetkerler oblys boiynsha 70 myńǵa jýyq úidi aralady. 68 myńnan astam órt qaýipsizdigi buzýshylyǵy anyqtaldy, 23 myńnan astam oqiǵa ornynda joiyldy, qalǵandary boiynsha usynystar berildi.
«Oblys boiynsha ákimdikpen jáne úkimettik emes uiymdarmen birlesip qosymsha 35 myńǵa jýyq datchik ornatyldy. Olar qaýip týraly aldyn ala habardar etedi jáne azamattardyń qaza bolýyna jol bermeidi. Jyl sońyna deiin bir jarym myń datchik ornatý josparlanýda», dedi Tótenshe jaǵdailar ministri Iýrii Ilin.
