Túrkistan oblysynda «Partiialyq emes baiqaý ortalyǵy» 1800-ge jýyq baiqaýshy daiarlaǵan. Bul týraly búgin óńirlik kommýnikatsiialar qyzmetinde ótken brifingte «Partiialyq emes baiqaý ortalyǵy» Respýblikalyq qoǵamdyq birlestiginiń Túrkistan oblysy filialynyń basshysy Baqytjan Áshirbaev aitty.
«Partiialyq emes baiqaý ortalyǵy» RQB-nyń Túrkistan oblysy filialy sailaý úderisine qoǵamdyq baiqaý júrgizý maqsatynda quryldy. Bul – ádil, ashyq sailaýǵa múddeli Qazaqstan azamattarynyń táýelsiz erikti birlestigi. Quramyna qoǵamdyq uiymdardyń ókilderi, jastar, sarapshylar, azamattyq belsendiler kiredi. Sailaýǵa monitoring júrgizý boiynsha qyrkúiek aiynyń 14 juldyzynan bastap 40-tan astam is-shara ótkizdik. Óńirdegi 17 aýdan, qaladaǵy baiqaýshylarmen 25 oqytý seminar-treningi, birinshi sailaýǵa qatysatyn jastardyń quqyqtyq saýattylyǵyn arttyrý boiynsha 5 jáne óńirimizdiń ziialy qaýym ókilderi men úkimettik emes uiymdarymen 6 kezdesý ótti. Sondai-aq, baiqaýshylarǵa arnalǵan treningter, aimaqtyq sailaý komissiialary jumystarymen tanysý baǵytynda 6 shara ótti», - dedi Baqytjan Shákiruly.
Spikerdiń sózinshe, sailaý ýaqytynda aqparattardy tiimdi basqarý jáne qaǵazbastylyqty azaitý maqsatynda arnaiy baiqaýshy bloknottary barlyq baiqaýshylarǵa úlestirilgen.
«Partiialyq emes baiqaý ortalyǵy» RQB-nyń Túrkistan oblystyq filialy 20 qarasha kúni óńirdegi 893 sailaý ýchaskesinde baiqaý jumysyn uiymdastyrady. Ókildikte 17 koordinator jáne ár sailaý ýchaskesinde eki azamattan jalpy 1786 baiqaýshy bar. Bul rette, 90 mobildi baiqaýshy, zańger jáne áleýmettik jelilerde saraptama júrgizetin eriktiler arqyly jumystar atqarady.
«Biz, azamattyq qoǵam ókilderi demokratiiany damytýdy, qoǵamnyń memleketti basqarýdaǵy múmkindikterin keńeitýdi jaqtaimyz. Aldaǵy sailaý – árbir qazaqstandyq úshin mańyzdy oqiǵa. Ol elimizdiń kóshbasshysyna qatysty halyqtyń tańdaýyn anyqtaidy. Bizdiń basty maqsatymyz – búkil sailaý protsesiniń zańdylyǵy men ádildigin qamtamasyz etý, daýys berýdiń ashyqtyǵy men jariialyǵynyń múltiksiz saqtalýyna atsalysý», - dedi B.Áshirbaev.
