Ishki ister ministri Erlan Turǵymbaev Túrkistan oblysy Shornaq aýylynda jastar arasynda týyndaǵan turmystyq janjalǵa qatysty mán-jaidy aityp berdi, dep habarlaidy "Ult aqparat".
«Túrkistan oblysy Shornaq aýylynda jastar arasynda turmystyq janjal boldy. Eki jaq bir-birine tas laqtyryp, saldarynan bir ýchaskelik inspektor men 3 turǵyn jaraqat aldy. Oqiǵa ornyna dereý jetken politsiia ýchaskelik inspektory jaraqat alǵanyna qaramastan zańbuzýshylyqtyń jolyn kesti. Jedel izdestirý sharalary barysynda janjalǵa qatysqan 4 azamat anyqtalyp, ustaldy», - dedi Erlan Turǵymbaev OKQ-da ótken baspasóz máslihatynda.
Onyń aitýynsha, qazirgi kezde janjaldyń neden shyqqany, barlyq mán-jai tekserilip jatyr. Buzaqylyq faktisi boiynsha tergeý bastalǵan.
«Biraq arandatýshylar áleýmettik jeli arqyly tártipsizdik jasaýǵa shaqyryp, jalǵan aqparat taratqan. Politsiia qyzmetkerleri bul zańsyz áreketterdiń jolyn kesti. Bul úshin zańǵa sáikes qylmystyq jaýapkershilik bar ekenin eskertemin. Aýyldaǵy tártipti qamtamasyz etý úshin politsiia qyzmetkerleri óz jumysyn kúsheitti. Qazir jaǵdai turaqty», - dedi ol.
