Túrkistan qalasynyń ákimi Rashid Aiýpov koronavirýs juqtyrdy. Bul týraly shahar basshysy Facebook paraqshasynda jariia etti, dep habarlaidy "Ult aqparat".
«Osydan birneshe kún buryn densaýlyǵym syr berip, dárigerler kómegine júgingen edim. Aldyńǵy kúni tapsyrǵan PTR analizi oń nátije kórsetip, Covid-19 indetine shaldyqqanymdy rastap otyr. Jumys barysymen, kúndelikti, adam sany kóp jerlerde bolýǵa májbúrmiz. Qansha saqtyq sharalaryn oryndasaq ta, bul indet shet ainalyp ótpedi. Naqty kimnen, qashan juqqanyn anyqtaý jumystary da júrgizilýde. Osyǵan orai, úide oqshaýlanýǵa májbúrmin. Jumysty alshaqtan qadaǵalap, paidaly bolýǵa tyrysamyn. Degenmen, qala ákimdigi jumysy ýaqytsha orynbasarym Musaev Tájibek Qalmanulyna júkteldi. Ákimdik ǵimaratynda zalalsyzdandyrý jumystary júrgizilip, qyzmetkerler de analiz tapsyratyn bolady. Bul kúnder de kóp uzamai ótip keterine senemin. Amandyqta júzdesý buiyrsyn! Denderimiz saý, jaqyndarymyz aman bolsyn!», - dep jazdy qala ákimi.
