Túrkistan oblysynyń fýtbol federatsiiasynda jyldy qorytyndylaý jiyny ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Basqosýǵa fýtbol federatsiiasynyń ókilderi jáne óńirimizdegi fýtbol komandalarynyń basshylary men bapkerleri qatysyp, birqatar máselelerdi talqylady. Jiynda alǵash bolyp sóz alǵan Túrkistan oblysy ákiminiń orynbasary Sáken Qalqamanov biylǵy maýsymda premer-liga oiyndaryna tuńǵysh ret qatysyp, ornyn saqtap qalǵan «Maqtaaral» fýtbol klýbynyń ujymyn quttyqtap, aldaǵy maýsymǵa sáttilik tiledi. Sondai-aq sóz barysynda Qazaqstan fýtbol federatsiiasynyń reglamentine sáikes «Maqtaaral» komandasynyń jyldyq biýdjeti 1 mlrd. 200 million teńgege ósetinin aityp ótti.
Túrkistan oblysynyń dene shynyqtyrý jáne sport basqarmasynyń basshysy Qanat Joldyqaraev maýsym barysynda komandalardyń kórsetken nátijelerin aityp, óz pikirimen bólisti. Onyń aitýynsha, biyl premer ligada oinaǵan «Turan» komandasynyń birinshi ligaǵa túsýine bailanysty keler maýsymda úsh birdei komandanyń birinshi ligada oinaýy oblys sportynyń biýdjetine aýyr soǵýy múmkin.
Osydan keiin Túrkistan oblysynyń fýtbol federatsiiasynyń prezidenti Hakim Kóshqaliev sóz alyp, chempionat kezinde óńir basshylaryn komandalardy barynsha qoldaýǵa shaqyrdy. Federatsiia basshysy óz sózinde chempionat kezinde ketken qatelikterdi de tilge tiek etti. Sonyń biri «Tomiris-Turan» áielder komandasynyń bapkerlik ujymyna qatań shara qoldaný kerek ekenin aita ketti. Olar tórt sary qaǵazy bar oiynshyny alańǵa shyǵaryp, óz upailarynan aiyrylǵan. Osylaisha, týrnir kestesinde úshinshi oryn alyp, chempiondar ligasynan qur qaldy.
Túrkistan oblysynda búgingi tańda fýtboldan el chempionatynda premer ligada «Turan» jáne «Maqtaaral» komandalary óńir namysyn qorǵap jatsa, birinshi ligada «Qyran», «Iassy» komandalary óner kórsetti. Sonymen qatar ekinshi ligada «Turan jastar», «Jas Qyran», «Arys» jáne «Maqtaaral jastary» bar. Al áielder arasynda «Tomiris-Turan» komandasy baq synady.
Keleli otyrys sońynda «Maqtaaral» fýtbol klýbynyń direktory Serikbai Ótegenov pen birqatar fýtbol mamandary arnaiy alǵys hatpen marapattaldy.
