Túrkistan qalasynan 16 shaqyrym qashyqtyqta ornalasqan halyqaralyq áýejaiǵa barar tasjoldyń boiy tutastai jasyl jelekke bólenedi, dep habarlaidy oblystyq ákimdiktiń baspasóz qyzmeti.
Munda 140 myń túp shaǵan, úieńki, qaraǵash, bozarsha, jide aǵash kóshetteri otyrǵyzyldy. Búginde tamshylatyp sýarý júieleri júrip jatyr. Mamandardyń aitýynsha, aldaǵy 2-3 jylda bul aimaq jaiqalyp, qalyń ormanǵa ainalady. Endi bul jerlerge dalalyq shóp tuqymdary sebilip, gazon tóselmek.
Jasyl jelekke oranǵan qaladaǵy qurylys barysyn baqylaýǵa shyqqan oblys ákimi Ómirzaq Shókeev jaýapty tulǵalarǵa tapsyrmalar berip, jumysty shiratýdy júktedi. Shaharda tek týristtik nysandarǵa ǵana kóńil bólip qoimai, jan-jaqty jumystar júrgizilýde. Túrkistan qalasyndaǵy ortalyq kóshelerdiń boiynda ornalasqan turǵyn úiler men ǵimarattardy biryńǵai, bir úlgige keltirý úshin jańartý jumystary júrip jatyr.
Túrkistanda jańa jelilik saiabaq salynyp jatyr. J.Maikotov kóshesiniń bir jaq betinde qurylysy bastalǵan jelilik saiabaq kóktemde ashylady. Turǵyndar úshin yńǵaily orta qalyptastyrý – basty nazarda. Sondai-aq, 28 ga quraityn qalalyq dendrobaqta 12 myńnan astam aǵash otyrǵyzylady. Jasyl aýmaq tolyq kógaldandyrylady. Birneshe jańa saiabaqtar ótken jyly paidalanýǵa berildi. «Áziret Sultan qoryq murajaiynyń aýmaǵyn abattandyrýdyń birinshi kezeńi «Ortalyq saiabaq» biyl paidalanýǵa berildi.
Túrkistan qalasyn túrki áleminiń rýhani ortalyǵyna ainaldyrý jáne týristerdi tartý maqsatynda Iasaýi kesenesiniń ainalasynda ashyq aspan astyndaǵy murajai, mádeni demalys oryndary qyzmet kórsetýde. Qalanyń tarihi ortalyǵynyń aýmaǵynda jeke investitsiialar esebinen respýblikada teńdesi joq kópfýnktsionaldy «Kerýen Sarai» týristik kesheniniń qurylysy júrgizilýde. Shyǵys úlgisinde salynǵan zamanaýi týristik keshende qolónershileri bar jabyq bazarlar, shyǵys bazary, saýda ortalyqtary, meimanhanalar, aspaly teatr, gandola qaiyqtarynyń júzýine arnalǵan birneshe sý arnalary, oiyn-saýyq ortalyǵy, sondai-aq halyqaralyq deńgeidegi qonaq úiler jumys isteitin bolady. Ómirzaq Estaiuly mádeni-rýhani ortalyqtaǵy qurylysy qainaǵan alańdaryndaǵy jumys barysyn baqylady.
