Elbasy Nursultan Nazarbaev Túrkistan qalasynda respýblikalyq jáne oblystyq BAQ ókilderimen kezdesip, suhbat berdi. Brifing barysynda Tuńǵysh Prezident Túrkistannyń damýyna qatysty óz oi-pikirin jetkizdi, dep habarlaidy QazAqparat.
Nursultan Nazabaevtyń aitýynsha, jańarǵan Túrkistan qazir barsha qazaqstandyqtyń basty nazarynda.
«Shyndyǵynda, mundai qarajat, mundai kóńil júzdegen jyldyq tarihy bar Túrkistanǵa eshqashan bólingen emes. Buǵan deiin Túrkistannyń 1500 jyldyǵyn atap ótkende «osy Túrkistandy bir kótersek» dep armandap edim. Alaida ol kezde eldiń buǵan jaǵdaiy bola bermedi. Sol aralyqta memleket quryldy. Qazaqstandy nyǵaitý men elimizdi dúniejúzine tanytý kerek dep shapqylap júrdik. Endi ýaqyt keldi, 2018 jyldyń maýsym aiynda Shymkent qalasyn million turǵyny bar dep bólip, men Jarlyqqqa qol qoidym. 2018 jyldyń aiaǵyna deiin uiymdastyrýmen, daiyndyqpen júrdik. Búkil Qazaqstandaǵy aýqatty jigitterdi jinadym, memleketke, ákimdikke tapsyrma berdim. Birinshi baǵdarlama jasadyq. Osylaisha Túrkistan oblysynyń bólingenine úsh jylǵa da jetken joq, 2019-20 jyldardyń ishinde 257 ǵimarat salyndy. Kórip otyrsyzdar. Sol kezben qazirgi kezdi salystyrýǵa bola ma? Jer men kóktei. Qazaqstannyń 30 jyldaǵy jetken jetistigi, eńbegi jer men kóktei», - dedi N.Nazarbaev.
Elbasy atap ótkendei, Túrkistandy kórkeitý eldiń astanasyn salýmen birdei keremet dúnie.
«Halqymyz óte tyǵyz qonystanǵan, qaimaǵy buzylmaǵan, dástúrimiz ben mádenietimiz saqtalǵan elde qalany ornatý birinshiden, el úshin, ekinshiden osy halyqqa jumys berý úshin, mádenietin kóterý úshin, dúniejúzine Qazaqstandy pash etetin másele boldy.
Oǵan qaramai Túrkistan oblys ortalyǵy bolǵannan keiin Shymkenttiń ózi órkendep sala berdi. Shymkenttiń biýdjeti úsh jyldyń ishinde úsh esege artty. Turǵyn úilerdiń qurylysy eki esege kóterildi. Orta jáne shaǵyn kásipkerlik kóterildi. Shymkent qalasynyń ózi ósip, keremet bolyp bara jatyr. Al, endi Túrkistanǵa keletin bolsa, alda áli kóp jumys atqarylýy kerek. Árine, bul ońtústikte turatyn aǵaiyndar úshin umytylmaityn jaǵdai. Táýelsizdikti bastaǵan kezde janymda júrgen azamattar ony eshqashan umytpaidy. Astanany salǵandaǵy istegen isimizdi eshkim umytpaidy. Túrkistannyń qurylysy da umytylmai, este qalatyn jaǵdai», - dedi Tuńǵysh Prezident.
N.Nazarbaev Túrkistan túrkitildes elderdiń rýhani astanasy dep jariialanǵanyn eske salyp ótti.
«Qazirdiń ózinde dúniejúzilik deńgeidegi áýejaidy Qazaqstanda birinshi ret Túrkistanda saldyq. Qazir Ystanbuldan eki reis keledi, jaqynda Tashkent, Ashhabad, Bishkekten keletin bolady. Reister kóbeiip, halyqaralyq poiyzdar qosylady. Sonda keletin týrister sany da kóbeiedi. Jumys qyzady, jastarǵa jumys oryndary ashylady. Múmkindikter kóbeiedi. Munda taǵy týristerge qyzmet etetin ýniversitet salyndy. Túrkistanda halyqaralyq deńgeidegi teatr salyndy. Mine, osyndai oilasaq oiǵa kelmeitin ister bolyp jatyr. Buǵan qýanaiyq. Osynyń bári Qazaqstannyń 30 jyldyǵyna jasap jatqan tartýy. Ata-babanyń armanyn oryndap, táýelsiz Qazaqstandy osylaisha kórkeitip jatyrmyz. Alla bizdi birlikten aiyrmasyn. Eldiń ishinde aýyzbirshilik myqty bolsyn. Qazaq birikkende - barlyǵyn jeńedi. Byltyr kelgen adam Túrkistandy qazir tanymaidy. Ai saiyn, jyl saiyn ózgerip turady. Qala Astanadan da tez damyp, salynyp jatyr.
Endigi, 2025 jylǵa deiin budan da úlken, keremet bolady. Qazir halqynyń sany 200 myń bolsa, 2025 jyly 300 myńnan asyp ketedi degen jospar bar. Biz elordany salǵan kezde 2030 jyly halqynyń sany bir million bolady degenbiz. Qazir 1 mln 200 myń, úsh million bolaiyn dep tur. Sondyqtan mynadai qarqyn bolsa - jetedi. Halyqtyń suranysy qandai, tipti irgetasy qalanyp jatqan turǵyn úilerdi satyp alǵysy keledi. Aldaǵy tórt jyldyń ishinde Túrkistanda 26 myń páter salynady dep josparlanyp otyr»,- dedi Nursultan Nazarbaev.
