Foto: Túrkistan oblysy ákiminiń baspasóz qyzmeti
Túrkistan oblysy ákimi janyndaǵy áielder isteri jáne otbasylyq-demografiialyq saiasat jónindegi komissiiasynyń kezekti jinalysy ótti. Jinalysqa Túrkistan oblysy ákiminiń orynbasary Beisenbai Tájibaev tóraǵalyq etip, júrgizip otyrdy. Kún tártibinde 2 másele qaraldy, dep habarlaidy «Ult aqparat».
Aldymen «Daǵdarys jáne otbasyn qoldaý ortalyqtarynyń» qyzmeti týraly Oblystyq jumyspen qamtý jáne áleýmettik baǵdarlamalar basqarmasynyń basshysy Ásiia Temirbaevanyń baiandamasy tyńdaldy. Otbasyn qoldaý ortalyqtary 12 aýdan, qalada ashylǵan. Onyń ishinde kommýnaldyq memlekettik mekemesi retinde Jetisai, Keles, Sairam, Shardara aýdandarynda qyzmet kórsetse, aýdandyq, qalalyq jumyspen qamtý jáne áleýmettik baǵdarlamalar bólimine qarasty kishi sektor retinde Maqtaral, Qazyǵurt, Otyrar, Saryaǵash, Saýran, Sozaq aýdandary men Arys, Túrkistan qalalarynda jumys atqarýda. Túrli qiyndyqqa tap bolǵan analar men balalarǵa, otbasylarǵa qoldaý kórsetetin ortalyqtardyń mańyzy zor. Jiynda osy baǵytta tiisti jumys júrgizbegen aýdan, qala ákimderiniń jaýapty orynbasarlarynyń esepteri tyńdaldy. Syn-eskertpe aityldy.
– Ana men bala quqyǵyn qorǵaý, otbasylyq zorlyq-zombylyqtyń aldyn alýǵa memleket tarapynan úlken kóńil bólinip tur. Bul máseleler qatań baqylaýda. Sondyqtan osy baǵyttaǵy jumystardy kúsheitińizder. Komissiia tarapynan aýdan, qalalarǵa issaparlar uiymdastyrylyp, qiyn jaǵdaidaǵy otbasylardyń jaǵdaiy saralansyn. Jergilikti atqarýshy organdar men jaýapty basqarmalar sol otbasylarǵa qoldaý kórsetýi qajet, – degen Beisenbai Tájibaev jaýaptylarǵa birqatar mindet júktedi.
Kún tártibindegi ekinshi másele – ana men bala óliminiń aldyn alýda memlekettik organdardyń jumys tiimdiligin arttyrý máselesi qaraldy. Sonymen birge demografiia, ana men bala densaýlyǵyna qatysty túitkilder tarqatyldy. Túrkistan oblysynyń densaýlyq saqtaý basqarmasy basshysynyń orynbasary Madina Mambetovanyń baiandamasy tyńdalyp, tiisti basshylarǵa tapsyrmalar júkteldi.
Aita keteiik, demografiialyq ósim boiynsha Túrkistan oblysy respýblikada kósh basynda tur. Biylǵy 8 aida óńirde 27 myńnan asa sábi dúniege kelgen.
