Foto: Túrkistan oblysy ákiminiń baspasóz qyzmeti
Memleket basshysynyń tapsyrmasyna sáikes, aǵymdaǵy jyly Qazaqstan Respýblikasy «Sý resýrstaryn basqarý júiesin damytýdyń 2024–2030 jyldarǵa arnalǵan tujyrymdamasy» qabyldandy, dep habarlaidy «Ult aqparat».
Búgingi tańda, oblysta 50 myń gektarǵa sý únemdeý tehnologiialary ornalastyryldy. Cý únemdeý tehnologiialary óndirisin damytý maqsatynda jergilikti 3 kásiporyn iske qosyldy. Kásiporyndardyń jyldyq qýattylyǵy 73,0 myń gektar alqapty qamtidy. Oblysta 552 myń gektar sýarmaly jer bar, bul Respýblikalyq kórsetkishtiń tórtten bir bóligi.
Osy turǵyda, óńirde sý nysandary infraqurylymyn damytý búgingi kúnniń eń ózekti máselesi bolyp tabylady. Oblysta uzyndyǵy 12 731 shaqyrymdy quraityn 4180 kanal, 42 sý qoimalary, 1 256 qashyrtqy, 1 794 uńǵyma bar. Sý nysandaryn salý, qalpyna keltirý jumystaryn jedeldetý úshin, oblystyq «Turan sý» kommýnaldyq mekemesiniń áleýetin tiimdi paidalaný qolǵa alyndy. Mekeme tarapynan, oblystyq menshiktegi qashyrtqylardy mehanikalyq tazalaý nátijesinde tozý kórsetkishi 80 %-dan 10 %-ǵa tómendedi.
Aǵymdaǵy jyly oblystyq biýdjetten 9 sý nysanyn kúrdeli jóndeýge, 6 sý nysanyn mehanikalyq tazalaýǵa qarjy bólindi. Nátijesinde 42,4 myń ga sýarmaly jerlerdiń meliorativtik jaǵdaiy jáne aǵyn sýmen qamtamasyz etilýi jaqsaratyn bolady. Oblys ákiminiń tikelei qoldaýymen «Turan sý» mekemesin tehnikalyq jaraqtandyrýǵa asa basymdylyq berilgen. 2023 – 2024 j.j. mekeme tabysy esebinen 60 birlik arnaiy tehnikalar bólip tóleý negizinde satyp alyndy. Mekeme tarapynan aýdan, qala ákimdikterine, kanaldar men aryqtardy tazalaý maqsatynda, quny 756,4 mln. teńgege 14 dana ekskavator keiinnen satyp alý tártibimen jalǵa berildi. Nátijesinde 714 shq. kanaldar, 387 shq. qashyrtqylar tazalanýda. Búgingi merekede aýdan, qala ákimdikterine qosymsha 10 dana arnaiy tehnikalar tabystaldy.
Aita keteiik, búgin Túrkistan qalasynda aýyl sharýashylyǵy qyzmetkerleri kúnine orai, «AGROFEST TÚRKISTAN - 2024» saltanatty sharasy ótip jatyr. Bul kúni turǵyndarǵa ala jazdai rizyq-nesibesin jerden tergen óńir diqandarynyń 3000 tonnadan astam ónimderi usynyldy. «Kerýen sarai» týristik kesheninde uiymdastyrylǵan merekelik sharada asyl tuqymdy mal sharýashylyǵy men tehnikalar kórmesi jáne aýyl sharýashylyǵy ónimderiniń jármeńkesi jáne Ulttyq sport túrlerinen jarystar ótýde.
Oblys ákimi Darhan Satybaldynyń sý únemdeý tehnologiiasyn endirý jáne óńirge investitsiia tartý boiynsha tapsyrmasyna sáikes búgin oblys ákiminiń orynbasary Nurbol Turashbekov «INNARI Innovation Nature Irrigation» kompaniiasynyń direktory Ian Fridelmen kezdesti. Topyraqty ylǵaldandyrýǵa arnalǵan qubyr óndirýmen ainalysatyn nemis kompaniiasynyń basshysy ónimdermen tanystyryp, irrigatsiialyq múmkindikterdi tiimdi júzege asyrý joldaryn usyndy.
«INNARI Innovation Nature Irrigation» ónimderi Qazaqstan naryǵynda 2013-jyldan beri qoldanysta. Kompaniia Túrkiia, Saýd Arabiiasy, Marokko, Ispaniia, Ońtústik Koreia jáne Qytai elderinde iri jobalardy júzege asyrýǵa atsalysyp keledi.
Túrkistan oblysynda sý únemdeý tehnologiiasyn keńinen qoldaný tapsyrmasy aiasynda búginge deiin 17,3 myń gektarǵa jańa tehnologiialar endirildi. Tehnologiianyń qol jetimdiligin arttyrý maqsatynda jylyna qýattylyǵy 73,0 myń gektar alqapty qamtamasyz etý múmkindigi bar 3 zaýyt iske qosyldy. Bul naryq baǵasyn 20 paiyzǵa tómendetýge múmkindik beredi. Sý únemdeý tehnologiialaryn endirý shyǵystarynyń 80 paiyzy memleket tarapynan sýbsidiialanýda. 2024 jyly 28 aýylsharýashylyq kooperativine 4673 gektarǵa memlekettik qoldaý kórsetildi.
Kezdesý barysynda Nurbol Turashbekov óńirdegi aýyl sharýashylyq salasynyń kórsetkishterine toqtalyp, memleket tarapynan kórsetilgen jeńildikter jaiyn jetkizdi. Seriktestik bailanysty nyǵaitý jolynda eki jaqty nátijeli sheshimder qabyldanatynyna senim bildirdi.
