Túrkimenstanda Prezident Gýrbangýly Berdimuhamedovtiń kitaptaryn halyqqa taratý boiynsha kezekti naýqan bastaldy, dep habarlaidy "Azattyq".
El táýelsizdiginiń 30 jyldyǵyna arnap shyǵarǵan prezidenttiń "Táýelsizdik — bizdiń baqytymyz" atty kitabyn memlekettik mekeme, kásiporyn qyzmetkerlerine jáne stýdentterge satyp alýǵa mindettep jatyr.
Azattyqtyń Túrkimen qyzmetiniń Lebap oblysyndaǵy tilshisi habarlaǵandai, jergilikti mádeniet qyzmetkerlerine prezident kitabyn maqtaǵan mýzykalyq shyǵarmalar daiyndaýǵa tapsyrma berilgen.
Budan bólek oblystaǵy joǵary oqý oryndarynyń stýdentterin prezidenttiń jańa kitabyn maqtaýǵa shaqyryp, olardy qyzyqtyrý úshin 100 manattan (resmi baǵam 28,5 dollar) syiaqy beriletinin aitqan.
Bul túrkimen prezidentiniń biyl jazǵan ekinshi kitaby. Mamyr aiynda Ashǵabadtyń 140 jyldyǵyna arnap "Aq qala - Ashǵabat" degen kitaby jaryq kórgen.
Berdimuhamedov bilikke kelgen 15 jyldan beri 60-tan astam kitaby shyqqan. Olardyń birqatary memlekettik meiramdar men túrli oqiǵalarǵa arnalsa, qalǵany túrkimen salt-dástúri, jylqy ósirý, dárilik shópter sekildi taqyryptarǵa arnalǵan.
Berdimuhamedov kitaptan túsken qarajatty qaiyrymdylyqqa jumsaitynyn birneshe ret málimdegen. Al bilik pen memlekettik BAQ halyqty onyń kitaptaryn satyp alýǵa májbúrleitini jaily tis jarmaidy.
Túrkimenstanda memleket basshysynyń kitaptarynan bólek, onyń portretteri de kúshpen taratylady. Memlekettik mekemeler jylyna birneshe ret Berdimuhamedov portretterin aýystyryp otyrady.
Elde azyq-túlik daǵdarysy men koronavirýs indeti ýshyǵyp turǵan tusta keibir aimaqta prezident portreti azyq-túlikke qosymsha "júkteme" retinde satylǵan.
