Túrkimenstandy uzaq jyl basqarǵan avtoritar basshy Gýrbangýly Berdimuhamedovtiń uly Serdar Berdimuhamedov 19 naýryzda prezident qyzmetine kiristi, dep habarlaidy Azattyq.
Inaýgýratsiia rásimi Ashǵabattyń "Rýhyet" saraiynda ótti.
"Bul kún Otannyń táýelsiz beitarap tarihyna demokratiialyq qurylymnyń qaitymsyzdyǵynyń belgisi bolyp, erekshe kezeń retinde enedi" dep jazdy memlekettik TDH aqparattyq agenttigi saltanatty rásim týraly habarlamasynda.
Quqyq qorǵaýshylar Túrkimenstandy avtoritarly memleketke jatqyzady. Ashǵabat Freedom House uiymynyń demokratiialyq damý reitingisinde eń tómengi oryndarda tur.
12 naýryzda ótken kezekten tys prezident sailaýynyń resmi nátijesi boiynsha Serdar Berdimuhamedov jeńiske jetken. 2006 jyly bilikke kelgen onyń 64 jastaǵy ákesi aqpan aiynda "jas býynǵa" jol berýge daiyn ekenin málimdegen. Budan soń elde merziminen buryn prezident sailaýy taǵaiyndaldy.
Biyl qyrkúiekte Serdar Berdimuhamedov 40 jasqa tolady. Zań boiynsha 40 jasqa tolǵan azamattar prezidenttikten úmitker bola alady. Sailaý biýlleteninde Berdimuhamedovtan bólek, bilikshil taǵy segiz adamnyń aty-jóni boldy. Resmi málimet boiynsha, Serdar Berdimuhamedov 73 paiyzǵa jýyq daýys alǵan.
Sarapshylar 1991 jyldan beri elde ótken sailaýlardyń eshqaisysyn halyqaralyq standartqa sai ádil ótti dep tanymaǵan.
Azattyqtyń Túrkimen qyzmeti daýys berý jáne sailaýaldy kampaniialar kezinde jappai zańbuzýshylyqtar (biýlletenderdi aýystyrý, bir adamǵa birneshe biýlleten berý, sailaýshylarǵa qysym jasaý jáne taǵy basqa) bolǵanyn habarlady.
Serdar Berdimuhamedov saiasatqa 2016 jylǵy qarashada aralasa bastady. Aldymen parlamenttegi bos orynǵa ótip, depýtat boldy. Sosyn syrtqy ister ministrligi aqparat departamentiniń basshysy boldy.
2018 jylǵy mamyrda syrtqy ister ministriniń orynbasary bolyp taǵaiyndaldy. Sodan beri jylyna birneshe ret jańa qyzmetke otyryp, saiasi laýazymy óse berdi.
Túrkimenstan tabiǵi gaz qory boiynsha álemde tórtinshi orynda tursa da, Gýrbangýly Berdimuhamedov tusynda halyqtyń turmys-tirshiligi kúrt nasharlaǵan.
