Túrkimenstan Prezidenti Gýrbangýly Berdimuhamedov jurttyń kózinshe alǵash ret koronavirýs sózin aitty.
"Koronavirýs álemde órship jatyr jáne munai-gazǵa bai Ortalyq Aziia memleketteriniń ekonomikasyna keri yqpalyn tigizip jatyr" dedi 3 sáýirde túrkimen basshysy.
Memlekettik BAQ-tyń habarlaýynsha, Berdimuhamedov koronavirýstyń taralýyna jol bermeý qajettigin aitqan. Alaida Túrkimenstandaǵy koronavirýs ahýaly týraly eshteńe aitpaǵan.
Postsovettik avtoritarlyq respýblika pandemiiaǵa bailanysty "únsizdik tanytyp keledi". Bilik eldegi koronavirýs ahýalyna bailanysty birde-bir ret málimdeme jasaǵan joq. Osylaisha halyqaralyq qaýymdastyqtyń kúdigin ulǵaitqan.
"Shekarasyz tilshiler" uiymynyń habarlaýynsha, pandemiia týraly aqparattyń jappai taralýynan seskengen bilik koronavirýs sózin aitýdan qashqaqtaidy.
"Kóshelerde koronavirýs sózin aitýǵa tyiym salyp, resmi qujattar men BAQ-ta jazýǵa tyiym salǵan Túrkimenstan úkimeti azamattardyń basyn qaýip-qaterge tigip otyr" dedi shtab-páteri Parijde shoǵyrlanǵan sóz bostandyǵyn qorǵaý jónindegi uiym.
Bilik 1 sáýirden bastap qyzmet kórsetý ortalyqtaryn, saýda oryndaryn, naýbaihanalardy jaba bastaǵan. Mektepte oqýshylardyń kóktemgi demalys ýaqyty sozylǵan. Kóshede mamandar jurttyń dene qyzýyn ólshei bastaǵan. Azattyqtyń Túrkimen qyzmetiniń derekkózderi elde koronavirýs juqtyrǵandar sany kúnnen-kúnge ósip kele jatqanyn, biraq bilik habarlamai otyrǵanyn aitady.
Halyqaralyq naryqta shikizat qunynyń arzandaýyna bailanysty Túrkimenstan ekonomikasy qiyndyqqa ushyrady.
Ortalyq Aziia aimaǵynda Tájikstanda da bilik koronavirýs baryn joqqa shyǵaryp keledi.
