Túrkistanda «Túrkiler tóri Túrkistan» atty halyqaralyq onlain konferentsiia ótti. Sharaǵa Túrkiia, Ázerbaijan, Ózbekstan jáne Qazaqstannyń alty óńirinen ataqty ǵalymdar, tanymal aqyn-jazýshylar men belgili tarihshylar, jýrnalister men mádeniet salasynyń mamandary qatysty, dep habarlaidy "Ult aqparat".
Sharany oblystyq ákimdiktiń Qoǵamdyq damý basqarmasynyń qoldaýymen jáne Qazaqstan Jýrnalister jáne Jazýshylar Odaqtary Túrkistan oblystyq filialdary uiymdastyrdy.
Onlain konferentsiiaǵa Senat pen Májilistiń, oblystyq máslihattyń depýtattary, aýdan ákimderi qatysyp, jalpy 300-dei adam Túrkistan óńirindegi kieli jerlerdiń qyr-syryna birshama qanyqty. Sharada sakraldy jerlerdi jan-jaqty zerttep jazyp, tarihtyń tereńine úńilgen qazaq ádebietindegi klassik jazýshysy Marhabat Baiǵuttyń «Túrkiler tóri Túrkistan» atty kitabynyń onlain tanystyrylymy ótti. Kitap aitýly ǵalym, isker basshy Darhan Qydyráli tizgin ustaǵan Halyqaralyq Túrki akademiiasynyń qoldaýymen jaryq kórgen bolatyn.
Túrkistan oblysy ákiminiń orynbasary Sáken Qalqamanov biyl 75 jasqa tolǵan mereitoi iesine memleket basshysy Qasym-Jomart Toqaevtyń, oblys ákimi Ómirzaq Shókeevtiń arnaiy quttyqtaýyn oqyp berdi. Jazýshyǵa arnaiy tartý-taralǵy usyndy. Qazaqstan Jýrnalister odaǵynyń tóraǵasy Seiitqazy Mataevtyń, Qazaqstan Jazýshylar odaǵynyń tóraǵasy Ulyqbek Esdáýlettiń, «Aýyl» partiiasynyń tóraǵasy, chenator Áli Bektaevtyń, májilismen, «Nur Otan» fraktsiiasynyń múshesi Darhan Myńbaidyń konferentsiianyń ashylýymen jáne mereitoimen quttyqtaǵan hattary týraly aityldy.
Onlain konferentsiiada qatysýshylar jaryssózge shyǵyp, Marhabat Baiǵuttyń kitap týraly pikirlerin ortaǵa saldy. Qoja Ahmet Iasaýi atyndaǵy Halyqaralyq qazaq-túrik ýniversitetiniń Senat zalynda ótken alqaly jiynda ýniversitettiń rektory Bolatbek Ábdirasylov sóz sóilep, qundy kitaptyń mańyzdylyǵyna toqtaldy. Jazýshyny mereitoiymen quttyqtap, «Túrkiler tóri Túrkistanda» aitylǵan kieli jerlerge bailanysty júrgizilip jatqan zertteý jumystary jaily jurtqa baiandap ótti. Talantty qalamger Marhabat Baiǵutqa júrekjardy lebizin bildirip, syi-syiapat jasady.
«Túrki álemine qyzmeti úshin» syilyǵynyń iegeri Marhabat Baiǵuttyń bul kitabyn Túrki akademiiasy jaryqqa shyǵaryp otyr. Jazýshy bul eńbeginde týǵan jeri Túrkistan óńiriniń tarihyn, tabiǵatyn, dalasy men taýlaryn, saiyn dalanyń uldary – dańqty tulǵalar, bileýshiler, ózge de qairatkerlerin arqaý etip, esselerge ainaldyryp baiandaidy. Sonymen qatar Marhabat aǵamyz qoǵamdaǵy máselelerdi kóterip, ony jan-jaqty zerdelei otyryp qamtyǵan, taqyryby aýqymdy. Óziniń ómirden kórgen-túigenin aq qaǵazǵa túsirip, keiingi urpaqqa týǵan jerdiń qasietin aita otyryp, qasterleýge úiretedi. Sizdiń Túrkistan óńiri týraly jazǵan osy eńbegińizben ólkemizdiń tarihyna úlken úles qosyp otyrsyz. Basqa eńbekterińizden orny bólek, oqyrmandarǵa ǵana emes, Túrkistanǵa arnaiy keletin sheteldik qonaqtarǵa da bereri kóp kitap ekeni sózsiz», – dedi Bolatbek Ábdirasylov.
Konferentsiia sońynda «Túrkistan týraly jyr» aitylyp, arnaiy daiyndalǵan beinerolikter kórsetildi. Jazýshy da jiyndy uiymdastyrýshylarǵa alǵysyn jetkizip, sharany túiindedi.
