Foto: Aqordanyń baspasóz qyzmeti
Túrkiia prezidenti Rejep Taiip Erdoǵan Astanada ótip jatqan Túrki memleketteri uiymynyń H sammitinde baýyrlas elderdi ózara viza bailanysyn jetildirýge úndedi, dep habarlaidy Kazinform agenttigi.
«Biz úshin túrki memleketteri aiasyndaǵy kólik jáne infraqurylym baǵytyndaǵy jobalar óte mańyzdy. Baký-Tbilisi-Jeihan shiki munai qubyry, tabiǵi gaz qubyry, TransAnatoliia qubyry, osynyń bári – bizdiń yntymaqtastyǵymyzdyń úlgisi. Kaspidiń tabiǵi gazyn Eýropa men Túrkiiaǵa tasymaldaý jalǵasady. Bul joba Eýropanyń energetikalyq qaýipsizdigi men túrki memleketteriniń gúldenýin qamtamasyz etedi. Sonymen qatar biz kólik jelilerine kóbirek kóńil bólýimiz kerek. Osyny eskere otyryp, biz ózimizdiń ortaq Kaspii-Batys-Shyǵys dálizin damytýǵa basymdyq beremiz. Biz saýda men kólik bailanystaryna kedergi keltiretin olqylyqtardy azaitýymyz kerek. Iaǵni, viza protsesterin jeńildetip, kedendik kedergilerdi sheshýimiz kerek», - dedi Rejep Taiip Erdoǵan.
Sondai-aq ol ortaq álipbi máselesi týraly pikir bildirdi.
«Árine, bizdiń birligimiz úshin til men ortaq álipbi óte mańyzdy. Bul jerde prezidentterdiń qoldaýy da óte mańyzdy. Osy baǵytta bizdiń Joǵary bilim keńesi arnaiy usynystaryn uiym hatshylyǵyna aitty. Ol usynystar joǵary baǵalanady dep úmittenemiz», - dedi Túrkiia prezidenti.
Eske salaiyq, búgin Astanada Túrki memleketteri uiymynyń H sammiti ótip jatyr. Jiynǵa Túrkiia, Ázerbaijan, Ózbekstan, Qyrǵyzstan prezidentteri uiymǵa múshe memleket basshylary retinde, Majarstan Premer-ministri men Túrikmenstan basshysy baqylaýshy eldiń basshylary retinde qatysady.
TMU sammiti «Túrki dáýiri» uranymen ótedi.
