Halyqaralyq Túrki akademiiasyn qarjylandyrý úshin el biýdjetinen 1 mln dollardan astam qarjy bólindi. Bul týraly QR Bilim jáne ǵylym ministri Ashat Aimaǵambetov aityp berdi, dep habarlaidy QazAqparat.
«Túrki akademiiasynyń qyzmetin onyń quramyna kiretin barlyq elder qarjylandyrady. Bul Túrkiia Respýblikasy, Qyrǵyzstan, onyń ishinde Qazaqstan. Olar tiisinshe osy uiymnyń jáne dál túrkitildes elderdegi basqa da uiymdardyń qyzmetin mólsherles shamalas kólemde qarjylandyrady», - dedi Ashat Aimaǵambetov Senat otyrysynan keiin tilshilerge bergen suhbatynda.
Ministrdiń aitýynsha, árbir uiymda memleketterdiń qarjylandyrý úlesi shtab-páterdiń ornalasqan jerine bailanysty ózgerip otyrady.
«Mysaly shtab-páteri Bakýde ornalasqan TúrkPA-ǵa kelsek, Bakýdyń qarjylandyrý úlesi onyń teń jartysyn quraidy. Túrkiiadaǵy TÚRKSOI jáne basqa da uiymdar bar, olardyń shamamen 46-48 paiyzy Túrkiia biýdjetinen qamtamasyz etiledi. Bul jaǵdaida Túrki akademiiasy Qazaqstan aýmaǵynda bolǵandyqtan, qalyptasqan dástúr men praktika boiynsha bizdiń jarnamyz shamamen 46 paiyzdy quraidy. Biýdjet jyl saiyn ózgerip otyrady. Biyl Qazaqstan biýdjetinen 1 million dollardan astam qarajat bólindi», - dep túsindirdi Aimaǵambetov.
Aita keteiik, búgin Senat túrkitildes memlekettermen yntymaqtastyqqa qatysty qujatty qabyldady. «QR Úkimeti men Túrki akademiiasy arasyndaǵy Túrki akademiiasyn ornalastyrýdyń sharttary men tártibi týraly kelisimdi ratifikatsiialaý týraly» Zańy qabyldandy.
