Foto: Ulysmedia.kz
Túrkistan oblysynda Belarýsten kelgen týristerden 200 myń teńge talap etti dep kúdikke ilingen politsiia qyzmetkerlerine qylmystyq is qozǵaldy. Bul týraly Májilis kýlýarynda Ishki ister ministriniń orynbasary Igor Lepeha málimdedi, dep habarlaidy Ult.kz.
Oqiǵa Shymkent–Samara tas jolynyń boiynda bolǵan. Belarýsten saiahattap kelgen blogerler álemjelide jariialaǵan videosynda jergilikti politseilerdiń eshbir negizsiz 200 myń teńge (shamamen 400 dollar) talap etkenin aitqan.
Týristerdiń sózine qaraǵanda, politseiler olardy «Qazaqstandyq tehnikalyq baiqaýdan ótpedińder, kameraǵa tústińder» dep aiyptaǵan, biraq naqty aiǵaq pen dálel kórsetpegen.
«Barlyq qujattarymyz durys, eshqandai ereje buzbadyq. Biraq olar 200 myń teńge tóleýdi talap etti. Bizge shekaraǵa deiin eshkim timeidi dep sendirdi. Bas tartýǵa múmkindik qalmady, amalsyz tóledik», – deidi belarýstik týrister.
Alǵashynda Túrkistan oblystyq politsiia departamenti bul oqiǵaǵa qatysty shaǵym túspegenin málimdegen bolatyn. Degenmen, álemjelide daý týdyrǵan bul jait boiynsha qazir qylmystyq is qozǵalyp, kúdikke ilingen qyzmetkerler jumystan bosatyldy. Sonymen qatar, osy politseilerdiń tikelei basshylaryna qatysty qyzmettik tekserý bastaldy.
