Pavlodar oblysyna Túrikmenstannan 11 otbasy kóship keldi. Olar oblystaǵy qala, aýdandardyń birin tańdap, sol jerlerde qonystanbaq, dep habarlaidy Pavlodarnews.kz.
Óńirge quramynda 46 adamy bar 11 otbasy kóship keldi. «Dostyq» úiinde ótken jiynda ár aýdan, qalalardyń jumyspen qamtý ortalyqtarynyń basshylary kelip, qandastarǵa bos jumys oryndary, qandai jaǵdai jasalatyny týraly málimet berdi.
Dúniejúzi qazaqtary qaýymdastyǵy «Otandastar qory» Pavlodar oblystyq filialynyń basshysy Bolat Zaýyt jyl basynan beri Resei, Monǵoliia, Ózbekstan elderinen 216 adam kóship kelgenin atap ótti.
"Biyl Pavlodar oblysyna shet elderden keletin qandastarǵa 800 adamǵa kvota bólingen. Al, Túrikmenstannan biyl 427 qandas keledi dep kútilýde. Sonyń bir bóligi, mine, kelip otyr. Bul otbasylar Túrikmenstannan Qazaqstanǵa vizany Pavlodar oblysyna barý úshin alǵan. Sondyqtan qazir tek osy oblysqa qonystanyp, kem degende bes jyl turýy tiis. Olai bolmasa, shara qoldanylady. Onyń bárin eskertip aittyq", - dedi Bolat Zaýyt.
Onyń aitýynsha, Qazaqstanǵa qonys aýdarǵan shet elderdegi qazaqtar aldymen JSN (jeke sáikestendirý nómirin) alýy tiis. Ol 1 kúnde beriledi. Keiin «Qandas» mártebesin alady. Ol 4 jumys kúni ishinde beriledi. Sodan keiin osy óńirge turaqty tirkeýge turyp, bir mezette Qazaqstan azamattyǵyna qujat tapsyrady. Osy úrdisterden keiin kvotaǵa qujat tapsyrady.
Pavlodar oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Almira Disiýpova qandastarǵa kvota boiynsha qandai kómek kórsetiletinin aitty.
"Qonys aýdarǵan otbasylardyń ár múshesine 70 AEK mólsherinde aqshalai kómek beriledi. Bul 200 myń teńgeden asady. Sondai-aq qonystanǵan jerlerine qarai 1 jyl boiy ai saiyn baspana jaldaýǵa sýbsidiia alady. Eger qalalyq jerde ornalassa, 61 myńnan 91 myń teńgege deiin, aýyldyq jerde 45 myńnan 64 myń teńgege deiin alady. Naqty soma otbasyndaǵy adam sanyna bailanysty. Sondai-aq 1 jyldyq somany bir jolda alyp, sol baspanany satyp alýǵa jumsaýǵa bolady", - dedi Almira Disiýpova.
Basqarma basshysy oblysta qandastarǵa arnalǵan boljamdy karta bar ekenin aitty. Onda 111 eldi meken belgilenip, 1 myńnan astam bos jumys orny anyqtalǵan.
"Kelgen otbasylar qazir mamandyqtary men bos jumys oryndaryna qarai qai aýdanǵa baratynyn anyqtaidy. Iaǵni, turatyn jerdi ózderi tańdaidy. Bizde ár aýdanda kvota bar. Qazirgi ýaqytta sál erterek kóship kelgen otbasy Aqsý aýyldyq aimaǵyn tańdap, turaqtandy. Otaǵasy gaz-elektr dánekerleýshi eken. Sol mamandyǵy boiynsha jumys jasaýda", - dedi Almira Disiýpova.
Basqarma basshysynyń aitýynsha, Túrikmenstannan kóbine tehnikalyq mamany bar, sonyń ishinde gaz-elektr dánekerleýshiler kelip jatyr. Al, oblysqa negizi densaýlyq saqtaý, bilim salasynyń mamandary kerek, degenmen ázirge ondai mamandar kelip jatqan joq.
Óńirimizge qonys aýdarǵandardyń biri Maqsat Súiesinov aýyldyq jerlerdiń birine baryp, mal sharýashylyǵymen ainalysýdy josparlaýda.
"Túrikmenstannyń Balqanabat ólkesinen keldik. Otbasymyzda tórt adambyz. Ulym men qyzym bar. Qyzym 8-synypta oqidy. Óz mamandyǵym – elektrik. Jubaiym úi sharýasynda. Munda Mai aýdany men Aqqýly aýdanynyń birine barsam dep otyrmyn. Mal sharýashylymen ainalysýǵa niet bar. Ol jaqta da mal ustaǵanmyn. Ata-anam osy Qazaqstanda. Pavlodar oblysy jaqsy eken. Qazaqstan keń baitaq jer ǵoi. Qai jeri bolsa da maǵan yńǵaily", - dedi Maqsat Súiesinov.
Aita keteiik, Túrikmenstandaǵy qandastar 2020 jyly Qazaqstanǵa kóshýge niet bildirgen. Onda 20 myńǵa jýyq qazaq turady. Alaida, pandemiiaǵa bailanysty keiinge shegerilgen. Kóbi ońtústik óńirlerdi tańdaǵan. Qazirgi kezde elimizde qoldanystaǵy saiasatqa bailanysty qandastardy soltústik óńirlerge baǵyndattaýda.
