Pavlodarlyq kelinshek shiettei qyzymen Stambuldan elge qaita almai otyr. Buǵan sebep balaǵa talas. Qazaqstan azamattyǵyna ie búldirshinniń Túrkiiadan attap basýyna sot tyiym salǵan. Óitkeni túrik jigiti onyń ákesi ekenin zań aldynda dáleldeýge kirisipti. Sóitip, ony tartyp almaq. Al, baýyr eti balamdy jat jurtqa tastamaimyn degen Viktoriia Mozgovaianyń endigi úmiti - diplomattarda.
Vikanyń túrik jigitpen qarym-qatynasy 3 jyl buryn bastalǵan. Shetel azamaty Pavlodarǵa arnaiy kelip, ony Stambulǵa ertip ketipti. Sóitip, ekeýi azamattyq nekede turady. Tek qyzdyń aiaǵy aýyr ekeni belgili bolǵanda, túrkiialyq romantik ushty-kúili joq bolǵan. Arbaýǵa túsken Viktoriia sol kezde elge oralady. Osynda bosanyp, qyzyna Qazaqstan azamattyǵy berilipti.
Viktoriia Mozgovaia:
- Bala meniń atyma jazylǵan. Ony baǵyp-qaǵýǵa meniń ǵana quqyǵym bar. Al, onyń esh qatysy joq.
Keiin nekemizdi zańdastyramyz dep, sábiimen Túrkiiaǵa qaita shaqyrtypty. Bir ret opyq jese de, kelinshek sezim jeteginde taǵy shekara asqan. Keiin belgili bolǵandai, Mehmet Aksoi esimdi azamatqa keregi kishkentai Ailin eken. Al, Viktoriianyń ózin uryp-soǵýdy shyǵarǵan. Tipti, onyń jaqyndaryna habarlasyp, qoqan-loqy kórsetipti.
Viktoriia Mozgovaia:
- Ábden zábir kórgen soń Qazaqstanǵa qaitpaq boldym. Biraq, buǵan da tosqaýyl qoiyldy. Iaǵni, áýejaida balamnyń Túrkiiadan shyǵýyna tyiym salynǵanyn bildik. Sóitip, amalsyz, osynda qaldym.
Sóitse, túrik azamaty balanyń ákesi ekenin zań aldynda dáleldeýge kirisipti. Iaǵni, azamattyq is qozǵatqan. Endi kishkentai Ailinge sot-meditsinalyq saraptama jasatqyzbaq. Biraq, Viktoriia buǵan túbegeili qarsy. Óitkeni, sotta bári rastalyp, perzenti Túrkiiada máńgilikke qalyp qoia ma dep qorqady. Anasynyń da ýaiymy osy.
Tamara Mozgovaia, Viktoriianyń anasy:
- Biz qyzymyzdyń túrik jigitpen bas qosýyna o basta qarsy boldyq. Biraq, júrekke ámir júrmedi. Endi nemerem ekeýin tez arada elge qaitarý kerek. Diplomattar qol ushyn sozsa eken.
Konsýldyq qiyndyqqa tap bolǵan qazaqstan azamattaryn qonaqúige ornalastyrǵan. Ári bul tyiymdy joiý týraly sotqa nota da joldapty.
Ánýar Jainaqov, QR SIM resmi ókili:
- Diplomattar Viktoriiamen bailanysta. Qoldan kelgen kómekti beremiz. Olardyń quqyǵyn qorǵaý úshin barymyzdy salyp jatyrmyz. Túrkiia sotyna tyiymdy alyp tastaý týraly taǵy da nota joldaimyz.
Biraq, diplomattardyń shaǵymyna sottyń qashan jáne qandai jaýap qatatyny belgisiz. Qazir Viktoriia balaǵa sot-meditsinalyq saraptama jasatýdan resmi túrde bas tartqan. Biraq kóńili áli jai tabar emes. Stambuldaǵy ár kúni qorqynyshpen ótip jatyr. Sondyqtan tezirek qyzymen birge Otanǵa oralsam deidi.
KTK arnasy
