Foto: © Sputnik / Kseniia Voronina
Soltústik Qazaqstan oblysynda qarjy saýattylyǵynyń jetispeýinen alaiaqtardan zardap shegetinder qatary kóbeigen, dep habarlaidy QazAqparat.
Óńirlik kommýnikatsiialar qyzmetinde «Internettegi alaiaqtyqtyń jańa túrleri» taqyrybynda baspasóz konferentsiiasy ótti. Politseiler qylmystyń bul túrimen kúreskenimen, aldyn alý jumystaryn júrgizgenimen, zardap shegýshiler azaiar emes. Biyl jyl basynan osyndai 259 derek tirkeldi.
Tártip saqshylarynyń aitýynsha, jelilik alaiaqtar sońǵy kezde halyqtyń qarjy saýatsyzdyǵyn paidalanatyn bolǵan. Olar tanymal beine-hostingter men áleýmettik jelilerde jeńil aqsha tabýǵa bolatyn túrli jobalarmen qyzyqtyrady.
Máselen, YouTube beinehostinginde «QazMunaiGaz» kompaniiasynyń investitsiialyq qorynda tabys tabýǵa shaqyrǵan habarlandyrýdy kórgen Petropavldyń 22 jastaǵy turǵyny bul múmkindikti paidalanbaq bolǵan. Silteme boiynsha ótkennen keiin oǵan aty-jónin, abonenttik nómirin qaldyrý usynyldy. Birneshe kúnnen keiin jigitke belgisiz adam uialy telefonyna qońyraý shalyp, ózin jarnama berýshimin dep tanystyryp, jumystyń mindeti – adamdardy kriptokontoraǵa tartý ekenin aitqan. Al jobaǵa qatysý úshin jáne birja arqyly kriptovaliýtamen jumysty bastaý úshin qarajat salýdy suraǵan. Osylaisha birneshe kún túrli syltaýmen aqsha sýyrtpaqtap otyrǵan. Saldarynan jábirlenýshi 700 000 teńgeden aiyrylyp, keiin politsiiaǵa júgindi.
Al Petropavl qalasynyń 50 jastaǵy turǵyny internette birjada tabys tabý týraly habarlandyrýdy kórgen. Habarlamada ol jeke málimetterin qaldyryp, birneshe kúnnen keiin oǵan belgisiz er adam qońyraý shalǵan. Munai kompaniiasynda «aqsha tabýdyń» sharttaryn túsindirgen. Brokerlik platformaǵa kirý úshin dep qarajat salǵyzyp, keiin birneshe ret qarjy aýdartqan. Odan soń jinalǵan aqshany alý úshin saqtandyrý tólemin jasaý qajettigin aitqan. Aqsha aýdarylǵannan keiin «jumys berýshiler» bailanysqa shyǵýdy toqtatty. Osylaisha áiel 1,5 mln teńgesinen aiyryldy.
Barlyq jaǵdaida zardap shegýshiler qarjysyn úshinshi bireýlerdiń banktik esepshotyna aýdaryp otyrǵan. Alaiaqtar tanymal messendjerler arqyly bank kartalaryn satyp alý jáne aqshany qolma-qolǵa aýdarý týraly habarlandyrý beredi. Politseilerdiń aitýynsha, qylmyskerlerge aqshany alýǵa kómektesetin «dropptar» keiin zardap shegýshige tolyq mólsherde keltirilgen shyǵyndy sot arqyly qaitarady.
