Elimizde 5 aidyń ishinde bastapqy turǵyn úi naryǵyndaǵy baǵa 5 paiyzǵa ósti. Bul týraly Májilis depýtattarynyń resmi saýalyna orai QR Básekelestikti qorǵaý jáne damytý agenttiginiń tóraǵasy Serik Jumanǵarinniń jaýabynda aitylǵan, dep habarlaidy QazAqparat.
«2020 jylǵy qyrkúiekte Memleket basshysy Qazaqstan halqyna Joldaýynda 2021 jyldyń ózinde Biryńǵai jinaqtaýshy zeinetaqy qorynyń 700 myń salymshysy jinaǵynyń bir bóligin turǵyn úi alýǵa jumsai alatynyn málimdedi. 2020 jylǵy qyrkúiekten bastap 2021 jylǵy qańtar aralyǵyndaǵy kezeńde bastapqy turǵyn úi naryǵyndaǵy baǵalardyń ósýi 5 paiyzdy qurady, al 2019 jáne 2020 jyldardyń uqsas kezeńinde ol 3 paiyzdan asqan joq», - dedi ol.
Alaida, agenttik tóraǵasy 5 aidyń ishinde baǵalardyń joǵary ósýi qaitalama turǵyn úi naryǵynda baiqalǵanyn, onyń 12,5 paiyzǵa jetkenin aitady.
«Bul rette, qandai da bir baǵalyq sóz bailasýdy qaitalama turǵyn úi naryǵyna qatysýshylardyń aitarlyqtai sany (páterlerdi satý týraly 130 myńnan astam habarlandyrý) joqqa shyǵarady jáne turǵyn úi baǵalarynyń ósýiniń negizgi sebebi suranystyń kúrt artýy bolyp tabylatynyn kórsetti. Aitalyq, Eńbek jáne halyqty áleýmettik qorǵaý ministrliginiń derekterine sáikes, alý úshin qoljetimdi zeinetaqy jinaqtarynyń jalpy somasy shamamen 1,4 trln teńgeni quraidy. Bul rette, osy jylǵy aqpannyń basynda zeinetaqy qorynan 386,4 mlrd teńge aýdaryldy», - dedi agenttik basshysy.
