Osy jyly Shyǵys Qazaqstan oblysynda 80 000 adam memleket syilyqaqysyn alady. Bul – Turǵyn úi qurylys jinaq bankinen («Báiterek» holdinginiń enshiles uiymy) salym ashqan aimaq turǵyndarynyń sany. Olardyń 21 000-y kelisim-shartty 2017 jyly resimdegen. Turǵyn úi qurylys jinaq banki Shyǵys Qazaqstan oblystyq filialy qyzmetiniń jyl qorytyndysy boiynsha ótken baspasóz máslihaty barysynda Qyzmet kórsetý ortalyǵynyń basshysy Aslan Samjanov osy jáne basqa da derekter týraly aityp ótti.
- Búgingi kúni Turǵyn úi qurylys jinaq banki salymdar boiynsha 13,3%-ǵa deiin baratyn eń tiimdi mólsherleme usynyp otyr. 2%-dyq negizgi mólsherlemesi bar depozit boiynsha mundai tabys dál osy 20% kólemindegi memlekettiń syilyqaqysy esebinen qalyptasady. Ol 200 ailyq eseptik kórsetkishten, basqasha aitqanda 453 800 teńgeden aspaityn soma boiynsha esepteledi. Iaǵni jyl boiy bizdiń klient osyndai soma jinasa ne ony birden shotyna salsa, 2017 jyldyń qorytyndysy boiynsha 90 760 teńgege teń eń úlken syilyqaqyny alady, - dep túsindirdi Aslan Samjanov.
Jyl ishindegi Turǵyn úi qurylys jinaq banki depozitinde jinalǵan aqsha 200 AEK-ten joǵary bolsa, memlekettik syilyqaqy eseptelmegen salym somasynyń bóligi kelesi jyly syilyqaqy taǵaiyndalarda eskeriletin bolady.
Osy ýaqytqa deiin 10 000-nan astam aimaq turǵyny Turǵyn úi qurylys jinaq bankinen 40,6 mln teńgege zaem alyp, turǵyn úi jaǵdailaryn jaqsarta alǵan. Zaimshylardyń jasy negizinen 30 ben 40-tyń aralyǵynda. Resimdelgen barlyq nesieniń 75%-y kommertsiialyq naryqtan páter satyp alýǵa berilgen eken.
2017 jyly «Nurly jer» memlekettik baǵdarlamasynyń aiasynda banktiń 105 salymshysy baspanaly bolǵan. Kelesi jyly taǵy 430 oblys turǵyny jańa úidiń iesi atanady dep josparlanyp otyr. Budan bólek aimaqtyq turǵyn úi baǵdarlamasynyń kómegimen 372 páterden turatyn 7 turǵyn úi salynyp, paidalanýǵa berildi.
Shyǵys Qazaqstan oblysyndaǵy Turǵyn úi qurylys jinaq banki balalar úileriniń tárbielenýshilerine de baspana alýǵa kómektesedi. Oblysta alty jyldan beri «Meiirim» atty baǵdarlama jumys istep keledi. Bul – ata-anasyz balalarǵa qoldaý bildirýge baǵyttalǵan áleýmettik joba. Baǵdarlama aiasynda ár balany qandai da bir patronat-uiym óz qamqorlyǵyna alyp, onyń qyzmetkerleri jylyna bir ret birkúndik jalaqylaryn Turǵyn úi qurylys jinaq bankindegi balanyń shotyna aýdaryp otyrady. Bul tárbielenýshi balalar úiinen shyqqanǵa deiin jalǵasady. Keiin ol oqýyn bitirip, jumysqa turǵan soń, TÚQJB salymynda jinalǵan qarajat esebinen páter satyp ala alatyn bolady.
Qazirgi ýaqytta banktiń oblystyq filialynda jetim balalar men ata-ana qamqorlyǵynsyz qalǵan balalardyń atyna 1 438 depozit ashylǵan. Olardyń tek 315-i boiynsha memlekettik járdemaqy beriledi, 1 mln men 5 mln teńge aralyǵynda aqsha jinalǵan depozitteri bar 45 salymshy 21 jasqa toldy.
Osy jyly ShQO-daǵy Turǵyn úi qurylys jinaq banki oblystyq filialynyń qyzmetkerleri atalǵan baǵyttaǵy jumystaryn kúsheitip, demeýshi bolýdyń mundai formasy tiimdi ári nátijeli ekenin óz isterimen kórsetti. Máselen, TÚQJB filialynyń ár qyzmetkeri birkúndik jalaqylaryn «Úmit» balalar úiiniń tárbielenýshisi Timýr Kainovtyń shotyna aýdardy. Kelesi jyly on segiz jasqa tolǵan soń Timýr memlekettik baǵdarlamaǵa qatysyp, jinalǵan qarajattyń kómegimen baspanaly bola alady.
2018 jyldan bastap Turǵyn úi qurylys jinaq banki áskeri qyzmetkerlerge arnalǵan jańa ónimdi usynatyn bolady. Áskeri mamandar biýdjetten turǵyn úidi jalǵa alý úshin alatyn turǵyn úi tólemderin paidalanyp, baspanaly bola alady.
Buǵan deiin «Turǵyn úi qatynastary týraly» QR zańyna sáikes, turǵyn úidi qajet etetin áskeri qyzmetkerler (merzimdi qyzmettegi áskeri qyzmetkerlerdi, kýrsanttar men kadetterdi qospaǵanda) jáne arnaiy memlekettik organ qyzmetkerleri turǵyn úi jaldaǵandary úshin maqsatty ótemaqy alatyn edi.
Tanymal jýrnalist, Turǵyn úi qurylys jinaq banki Qoǵamdyq keńesiniń tóraǵasy Sergei Ponomarevtiń pikirinshe, bul jaǵdai «ótemaqy alýshylardy baspanamen qamtamasyz etpeidi, tek olardyń qysqa merzim ishinde úidi jalǵa alyp otyrýdy ǵana usynady».
Kelesi jyldan bastap áskeri qyzmetkerler dál osy turǵyn úi tólemderin paidalana otyryp, turǵyn úi qurylys jinaq júiesine qatysý arqyly baspanaly bola alady.
Jańa model qai jaǵynan alsań da tiimdi bolmaq. Birinshiden, tutynýdan qarajat saqtap, jinaýǵa kóshýge múmkindik beredi, sebebi áskeri jáne arnaiy organ qyzmetkerleri turǵyn úi tólemderin baspanaly bolamyn dep jinai bastaidy.
Ekinshiden, jańa mehanizm biýdjet shyǵyndaryn áskeri qyzmetkerlerdiń baspanaly bolýy úshin jumsalýyna jol ashady, al qazir ol qarajat jalǵa berýshilerdiń qaltasyna ketip jatyr.
Úshinshiden, áskeri qyzmetkerlerdi nesielendirý bir ónim aiasynda júzege asyralatyn bolady. Iaǵni turǵyn úi tólemderin alýshylar men turǵyn úi tólemderiniń kólemi bir ortalyqtandyrylady, respýblikalyq biýdjetten bólinetin aqshanyń qalai paidalanylyp jatqandyǵy ashyq júredi.
Jańa ónimge sáikes áskeri qyzmetkerler jańa úi de, qaitalama naryqtaǵy jyljymaityn múlikti de satyp ala alatyn bolady. Baǵdarlamaǵa sáikes zaem boiynsha soma shekteýi joq. Jinaq kólemi nemese alǵashqy jarna neǵurlym úlken bolsa, zaem somasy da soǵurlym joǵary bolady. Ónim sharttarynyń biri – zaem boiynsha tólem kólemi turǵyn úi tólemi kóleminen aspaý kerek.
Qazirgi ýaqytta Shyǵys Qazaqstan oblysynda 54 áskeri bólimshe bar.
