Turǵyn úi qurylys jinaq banki («Báiterek» holdinginiń enshiles uiymy) salymshylary endi depozitterin sata alady. Bul shotqa ielik etý quqyǵyn úshinshi tulǵalarǵa berýdi qarastyratyn onlain-tabystaý servisiniń arqasynda múmkin bolyp otyr. Optsiia «JSSB 24» internet-bankinginde paida boldy.
Satylymǵa jinaq merzimine kem degende 1 jyl bolǵan depozitter ǵana shyǵarylady. Shotty tek bir ret qana satýǵa bolady.
- Jyl basynan beri 83 000-nan astam qazaqstandyq Turǵyn úi qurylys jinaq bankinen shot ashty. Bul azamattar turaqty túrde aqsha salyp otyryp, kemi úsh jyldy quraýy tiis merzim men 16-ǵa jetkizýdi qajet etetin baǵalaý kórsetkishine qatysty bank talaptaryn oryndaǵan jaǵdaida, 5% mólsherlememen turǵyn úi zaimyn ala alady. Bankte turǵyn úi zaimyn alýǵa kelip qalǵan, biraq belgili bir jaǵdailarǵa bailanysty kelisim-shartty buzyp, jinaǵan aqshasyn qaitaryp alýdy sheshken klientter bar. Bul jaǵdaida olar bizdiń jańa qyzmetimizdi, iaǵni depozitterge ielik etý quqyǵyn úshinshi tarapqa onlain jolmen berý ádisin qoldana alady. Sebebi jaqsy jinaq merzimi jáne somasy bar shotty satyp alamyn deitin jandardyń da qatary kóp. Olar uzaq kútpei-aq, az ýaqyttyń ishinde tómen paiyzben turǵyn úi zaimyn resimdei alatyn bolady, - dep túsindirdi Turǵyn úi qurylys jinaq banki basqarma tóraiymy Lázzat Ibragimova.
Qazir depozitke ielik etý quqyǵyn berýdi tek jaqyn týystar arasynda ǵana júrgizýge ruqsat etilgen. Salymshylar arasyndaǵy shekten tys alypsatarlyqqa tosqaýyl qoiý jáne memlekettik baǵdarlamalar aiasynda páter satyp alý tártibin buzbaý úshin kelisim-shartty úshinshi tulǵaǵa satý múmkindigine bank kezinde tyiym salǵan bolatyn. Jańa servisti ázirleý barysynda bank bul máselelerdi eskerip otyr. Bul ádispen satylǵan shot arqyly depozittiń jańa iesi úidi tek kommertsiialyq naryqtan ala alady. Mundai salymdar memlekettik baǵdarlamalarǵa qatysa almaidy. Osylaisha jeńildetilgen sharttarmen áleýmettik turǵyn úi alý úshin óz betinshe jáne turaqty túrde aqsha jinap jatqan salymshylardyń múddesi qorǵalady.
Depozitterdi satýdyń jańa servisi barynsha aiqyn, ashyq jáne anonim bolady. Is júzinde protsess kelesidei júredi: depozit satýshy «JSSB 24» internet-bankinginde shotyn satylymǵa shyǵaratyny týraly habarlandyrý jariialap, bastapqy baǵany kórsetedi. Ol satylatyn shottaǵy barlyq jinaqtyń jalpy somasynyń 20%-nan aspaýy tiis. Mysaly, bank klientiniń salymynda 1 mln teńge jinalsa, ol depozit úshin 1 200 000 teńgeden aspaityn bastapqy baǵany qoia alady.
Depozit satyp alamyn degen adam saýdaǵa qatysý úshin onlain-tólemniń kómegimen 20 000 teńge kólemindegi kepildik jarnasyn tóleidi. Bul onyń shyn máninde shot alýǵa nietti ekeniniń rastaidy. Osydan keiin qolaiyna keletin habarlandyrýdy tańdap, depozitti satyp alamyn degen baǵasyn kórsetip, ótinish jiberedi. Baǵanyń ósý qadamy 20 000 teńge. Satyp alýshy usynatyn eń joǵary soma jinaq somasyna teń qarajat kóleminen aspaýy tiis.
Ótinim qabyldaý merzimi aiaqtalǵan soń, júie jeńimpazdy, iaǵni eń joǵary baǵa usynǵan adamdy anyqtaidy. Al basqa qatysýshylarǵa kepildik jarnasy avtomatty túrde qaitarylady.
Osydan keiin depozitke ielik etý quqyǵyn aýystyrý rásimi bastalady. Satýshy qujattarǵa qol qoiyp, depozit aqysy aýdarylýy tiis shot rekvizitterin kórsetedi. Satyp alýshy da tiisti qujattarǵa qol qoiyp, salym aqysyn tóleidi. Munyń bári onlain-rejimde júredi.
Bul kezeńde satyp alýshy mámileden bas tartamyn dep sheshse, onyń kepildik jarnasy qaitarylmaidy, bul soma satýshyǵa beriledi. Satýshy bas tartqan jaǵdaida, 1 ai boiy salymyn qaita satylymǵa shyǵara almaidy, al kepildik jarnasy depozitti satyp alýǵa niet bildirgen adamǵa qaitarylady. Bul protseske qatysýshylardyń mámilege barynsha baiyppen qarap, jaýapkershilikti sezinýleri úshin jasalyp otyr.
Depozitti úshinshi tulǵaǵa satý – banktiń aqyly qyzmeti. Komissiia jinaq somasynyń 0,5%-na teń. Ol satyp alýshydan alynady.
Qazirgi ýaqytta onlain-tabystaý servisi internet-bankingtiń veb-nusqasynda ǵana qoljetimdi. Qyzmettiń mobildi nusqasy ázirlenip jatyr.
