"Turǵyn úi qurylys jinaq banki" AQ tiisti litsenziiany kútpesten "7-20-25" baǵdarlamasy boiynsha ipoteka bere bastaidy. Bul týraly banktiń jarnama jáne qoǵammen bailanys departamentiniń direktory Záýre Masǵutova aitty, dep habarlaidy Sputnik agenttigi.
TÚQJB "7-20-25" baǵdarlamasy boiynsha osy jyldyń 1 shildesinen ipotekalyq qaryz bere bastaidy. Biraq ázirge bank memleket basshysy bastamashy bolǵan baǵdarlamaǵa qatysa almaidy. Óitkeni "Turǵyn úi qurylys jinaqtary týraly" zańǵa ózgerister engizilmegen.
"TÚQJB "Baspana" ipotekalyq kompaniiasymen ("7-20-25" baǵdarlamasynyń operatory, Ulttyq banktiń enshiles kompaniiasy – Sputnik) yntymaqtasyp jumys isteý úshin "Turǵyn úi qurylys jinaqtary týraly" zańǵa ózgerister engizý kerek. Sonda ǵana bank senimdi basqarýmen ainalysý quqyǵyna ie bolady. Iaǵni, bank kredittik portfeliniń bir bóligin "Baspanaǵa" bere alady. Májilis pen Senat atalǵan ózgeristerdi maquldady, qazir zań qol qoiý úshin prezidentke usynyldy", — dedi Záýre Masǵutova.
Zańǵa túzetýler osy jyldyń tamyz-qyrkúiek ailarynda engiziledi dep josparlanýda.
Masǵutovanyń aitýynsha, ýaqyt joǵaltpas úshin túzetýlerge qol qoiylǵanǵa deiin bank "7-20-25" shemasy boiynsha ipoteka berýdi bastaidy. Zańnamaǵa tiisti ózgerister engizilgennen keiin Turǵyn úi qurylys jinaq banki Ulttyq banktiń litsenziiasyn alýdy josparlap otyr, al keiin baǵdarlama operatorymen kelisim bekitedi.
"Osydan keiin TÚQJB azamatttarǵa berilgen qaryzdardy "Baspana" ipotekalyq kompaniiasyna tapsyra alady", — dedi Masǵutova.
Aldaǵy úsh aida bank 7,5 milliard teńgedei ipotekalyq qaryz berýdi josparlap otyr.
Aita ketsek, "7-20-25" turǵyn úi baǵdarlamasy boiynsha ár jumys isteitin qazaqstandyq nesiege baspana satyp ala alady. Qazaqstandyqtar kelesi sharttarmen ipotekalyq qaryz alý múmkindigine ie bolmaq: nesie boiynsha syiaqy mólsherlemesi – jylyna 7%-dan, bastapqy jarna — 20%-dan aspaidy, nesieni tóleý merzimi – 25 jylǵa deiin. Ipotekalyq baǵdarlama boiynsha nesieler tek ulttyq valiýtamen beriledi.
