Memleket basshysy Qasym-Jomart Toqaev Ishki ister ministri Erlan Turǵymbaevty qabyldady, dep habarlaidy "Ult aqparat" Aqordanyń resmi saityna silteme jasap.
Prezidentke Ishki ister ministrliginiń 2020 jyly atqarǵan jumystarynyń nátijeleri men kriminogendik ahýaldyń jai-kúii týraly aqparat berildi. Ministrdiń aitýynsha, elimizdegi qylmys kórsetkishi 37 paiyzǵa tómendegen, sondai-aq, urlyq, qaraqshylyq, tonaý, buzaqylyq jáne zorlaý túrindegi qylmystardyń da sany azaiǵan. Kóshelerde jáne basqa da qoǵamdyq oryndarda qaýipsizdik deńgeii artqan. Jol-kólik oqiǵalarynyń jáne sonyń saldarynan jaraqattanǵan, qaza bolǵan adamdardyń sany qysqarǵan.
Qasym-Jomart Toqaev bul baǵyttaǵy jumystardy turaqty baqylaýda ustaý qajettigin atap ótti.
Sonymen qatar Prezidentke buryn berilgen tapsyrmalardyń oryndalý nátijeleri týraly esep berildi.
Erlan Turǵymbaev Ishki ister ministrligi júiesinde 2021 jyldyń «Quqyq buzýshylyqtyń aldyn alý jyly» dep jariialanǵanyn aityp, ishki ister organdaryn reformalaý jónindegi jobalardyń júzege asyrylýyna egjei-tegjeili toqtaldy. Atap aitqanda jumystyń servistik modelin engizý, «jurtqa jaqyn politsiia» qaǵidatyn qamtamasyz etý, ýchaskelik inspektorlar qyzmetin reformalaý jóninde sóz boldy.
Memleket basshysyna ishki ister organdarynyń qyzmetin tsifrlandyrýǵa qatysty jobalar, azamattarǵa politsiiamen jedel bailanys ornatýǵa múmkindik beretin «Police 102» mobildik qosymshasyn iske qosýdyń alǵashqy nátijeleri týraly baiandaldy.
Prezident azamattardyń politsiiaǵa degen senimin arttyrýda aitarlyqtai jetistikke qol jetkizýge múmkindik beretin sapaly reforma júrgizý qajettigine basa mán berdi.
Osy rette Ishki ister ministri kadrlardy irikteý júiesiniń jetildirilip jatqany, jańa biliktilik talaptarynyń bekitilgeni, sybailas jemqorlyqqa qarsy immýnitettiń qalyptasýy, ideologiialyq jáne imidjdik jumystardyń kúsheitilgeni jaiynda málimet berdi.
Budan bólek Prezidentke qylmystyq-atqarý júiesin jańǵyrtý, jazasyn óteýshilerdiń jaǵdaiyn jaqsartý jáne olardy jumyspen qamtý, sondai-aq, koloniialarda jappai beinebaqylaý qurylǵylaryn ornatý boiynsha qabyldanyp jatqan sharalar týraly baiandaldy.
Ministr eńbekaqyny kóbeitýge jáne áleýmettik jaǵdaidy jaqsartýǵa qatysty memlekettik qoldaý sharalary úshin Prezidentke qyzmetkerlerdiń alǵysyn jetkizdi.
Kezdesý qorytyndysy boiynsha Memleket basshysy elimizdegi quqyqtyq tártip deńgeiin odan ári arttyrýǵa, azamattardyń politsiiaǵa degen senimin nyǵaitýǵa jáne qazirgi zamanǵy syn-qaterler men qaýipterge qarsy turýdyń tiimdiligin qamtamasyz etýge baǵyttalǵan birqatar tapsyrma berdi. Sondai-aq Qasym-Jomart Toqaev memlekettik qyzmet kórsetý isin tsifrlandyrý jumystaryn jalǵastyrý mańyzdy dep sanaitynyn aitty.
