Túrkistan oblysynyń sport basqarmasynda «Turan» sport oiyn túrleri klýbynyń gandbol komandasyn marapattaý rásimi ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Qol doby sheberleri biylǵy maýsymda sýperligada jáne joǵary ligada da el chempiony atandy. Osyndai aitýly jetistikterimen oblystyq dene shynyqtyrý jáne sport basqarmasynyń basshysy Qanat Joldyqaraev quttyqtap, komanda jattyqtyrýshylary men sportshylaryna sporttyq kiimder jáne baǵaly syilyqtar tabys etti.
Qol dobynan elimizdiń kásibi klýbtary arasynda Túrkistan oblysynyń namysyn qorǵaityn «Turan» komandasynyń oiynshylary biyl sýperligada jasyndai jarqyldap, jeńimpaz atandy. Talantty kásibi oiynshylardan quralǵan «Turan» gandbol komandasynyń bas bapkeri Maqsatbek Narmetov «sýperliga men joǵary ligada jeńimpaz ataný Qazaqstan tarihynda tuńǵysh ret bolyp tur» dep óz qýanyshymen bólisti.
Gandboldan elimizdiń joǵary liga komandalary arasynda 8 komanda baq synady. Bul synda Túrkistannyń «Turan» gandbolshylary taǵy da qarsylas shydatpady. El chempionatynyń sýperliga men joǵary liga komandalary arasynda altyn medal ielengen túrkistandyqtardy Qanat Joldyqaraev pen Túrkistan oblysynyń gandbol federatsiiasynyń prezidenti Erdos Álibekuly jáne «Turan» sport oiyn túrleri klýbynyń direktory Sabyrjan Buldyryqov quttyqtap, oiynshylarǵa sporttyq kiimder tabystady. Sonymen qatar aldaǵy maýsymǵa sáttilik tiledi.
Aita keterligi, biyl gandboldan Qazaqstan ulttyq quramasyna oblysymyzdyń «Turan» komandasynan 13 oiynshy qabyldandy. Bul – kásibi gandbolshylardy daiyndap otyrǵan komanda úshin joǵary jetistik. Jeńiske degen kúsh-jigerleri myqty «Turan» gandbol komandasy jańa maýsymǵa oqý-jattyǵý jiyndaryn ulttyq qurama múshelerimen birlesip, 16-shy qańtarda bastaýdy josparlaýda.
Osy qabyldaýda basqarma basshysy parasportshylarǵa da qurmet kórsetti. Portýgaliia memleketinde ótken parasportshylar arasyndaǵy saiysta el namysyn qorǵaǵan Muqan Aitmyrzaev naiza laqtyrýdan, Temirbek Toǵanbai 100 metr qashyqtyqqa júgirýden jáne disk laqtyrýdan, Shahrýh Sanvar 100 jáne 200 metr qashyqtyqqa júgirý men uzyndyqqa sekirýden qola medalǵa qol jetkizgen bolatyn. «Saýran» sport klýbynyń direktory Abai Qazievtiń sózinshe, bul dodada júldeger atanýdyń ózi mártebe. Álem jurtshylyǵy aldynda Kók bairaǵymyzdyń kókke kóterilýi kúlli Qazaq eliniń jeńisiniń jemisi.
