Jańa Qazaqstanda depýtattardyń da oiy ózgerip jatyr. Biraq Tuńǵysh Prezidentti eshkim satyp jatqan joq. Aldaǵy konstitýtsiialyq ózgeristerge qatysty pikir bildirgen senator Nariman Tóreǵaliev osylai aitty, dep habarlaidy Sputnik Qazaqstan.
"Árine, kemshilikter boldy. Mysaly, sybailas jemqorlyq, basqa da máseleler boiynsha kemshilikter kóp-aq. "Oǵan kim kináli?" degen suraq týyndaidy. Oǵan bárimiz kinálimiz. Keide jalǵyz Úkimet kináli dep jatamyz ǵoi. Oǵan Parlament te, Úkimet te, biliktegi adamdardyń bári kináli. Sonyń ishinde halyq ta bar", - dedi Tóreǵaliev jýrnalisterge bergen suhbatynda.
Onyń aitýynsha, Jańa Qazaqstanda depýtattardyń oiy da ózgerip jatyr. Biraq "Tuńǵysh Prezidentti eshkim satyp jatqan joq".
"Jalpy, qazirgi saiasi reformalarǵa qoldamaityn bolsaq, onda ózgerissiz otyra bereiik. Ózińiz aitqandai, 30 jyl boiy otyrdyq qoi. Jańa Qazaqstanda depýtattardyń da oiy ózgerip jatyr dep esepteimin. Biraq bul jerde Tuńǵysh Prezidentti eshkim satyp jatqan joq. Ol kisiniń istegen eńbegin sizder de bilesizder. Ony joqqa shyǵara almaimyz. Kez kelgen adamnyń boiynda qatelik bolady. Árine, qatelikter boldy. Biraq ol kisi dym istemedi de, joqqa shyǵaratyn bolsaq, durys emes", - dep atap kórsetti Tóreǵaliev.
Senatordyń sózine qaraǵanda, Konstitýtsiiadan Nursultan Nazarbaevtyń barlyq mártebesin alyp tastaǵannan keiin biýdjet shyǵyndary da azaiady.
"Árine, statýsty alyp tastaǵannan keiin sol statýsqa qarastyrylǵan barlyq qarajat toqtatylady. Biýdjet bekitilse de, ony basqa qajettilikterge jumsaidy", - deidi Tóreǵaliev.
