Búgin Beibitshilik jáne kelisim saraiynda Qazaqstan halqy Assambleiasynyń uiymdastyrýymen ótken "Qaiyrymdylyq kerýeni" respýblikalyq qaiyrymdylyq forýmynda "Tuńǵysh prezident jolymen" halyq ekspeditsiiasy" jobasynyń bastalǵandyǵy jariialandy. Bul týraly QHA baspasóz qyzmeti habarlady.
Qazaqstan halqy Assambleiasy Tóraǵasynyń orynbasary Janseiit Túimebaev Almaty oblysynyń ákimi A.Battalovqa ekspeditsiianyń simvoly retinde ekspeditsiia kúndeligi men týyn tabys etti.
Aimaqtardan kelgen qoǵam belsendileri men jomart jandarǵa qurmet kórsetilip, marapat usynylǵan atalmysh forýmǵa QR Memlekettik hatshysy Q.Kósherbaev, QHA tóraǵasynyń orynbasary – hatshylyq meńgerýshisi J.Túimebaev, QR Parlamenti Májilisiniń depýtattary, áleýmettik baǵyttaǵy ortalyq memlekettik organdardyń basshylary, QHA músheleri, óńirlerden kelgen metsenattar, demeýshiler, qaiyrymdylyq uiymdary men qorlar, etnomádeni birlestikter men úkimettik emes uiymdardyń ókilderi qatysty.
Forým aiasynda Qazaqstan halqy Assambleiasynyń "Tuńǵysh prezident jolymen" halyq ekspeditsiiasy" jobasy tanystyryldy.
Assambleianyń 25 jyldyǵynyń qarsańynda qolǵa alynǵan atalmysh joba Elbasynyń táýelsiz Qazaqstandy qurý men damytýdaǵy eren eńbegin dáripteýge, nasihattaýǵa arnalǵan. Ekspeditsiia 2020 jyldyń aqpan aiynda bastalady. Ol Qazaqstannyń barlyq óńirleri men Elbasynyń shetel memleketterinde júrip ótken joldaryn qamtidy.
"Halyq ekspeditsiiasy" dep atalýynyń sebebi, onyń basty arqaýy Elbasy men halyq bolady. Táýelsiz Qazaqstannyń negizin qalaýshy, Tuńǵysh prezident Nursultan Ábishuly Nazarbaev elimizdiń árbir azamatynyń ómirinde mańyzdy ról atqardy. Sondyqtan, bul joba Assambleianyń 25 jyldyǵynda Tuńǵysh prezident – Elbasy N.Á. Nazarbaevtyń táýelsiz Qazaqstandy qurýdaǵy eren eńbegin qoǵamdyq sanada bekitýge baǵyttalǵan. Biz buqaralyq qoǵamdyq sanada birlik pen kelisimniń jalpyulttyq shoǵyrlandyrýshy qundylyqtaryn nyǵaitý jolynda jumys isteitin bolamyz. Bul jumystyń negizine Elbasynyń Qazaqstannyń damýynyń qazirgi kezeńine arnalǵan baǵdarlamalyq tujyrymdary alynady, - dedi Janseiit Qanseiituly jobanyń saltanatty tanystyrylymynda sóilegen sózinde.
Janseiit Túimebaevtyń aitýynsha, halyq ekspeditsiiasy Elbasy Nursultan Nazarbaevtyń ómir jolyndaǵy mańyzdylyǵy joǵary kezeńder men jol tarmaqtaryn qamtidy. Jáne ol úsh baǵyt boiynsha júzege asyrylady.
Basty marshrýt 2020 jyldyń basynda Almaty oblysy Qaskeleń aýdanynyń Shamalǵan aýylynan bastalady. Bul mekende Elbasy dúniege keldi, oqydy, ósti. Bul jerde bolashaq Prezident tulǵa retinde qalyptasty, onyń alǵashqy armandary men úmitteri osy jerde ot aldy. Odan keiin halyqtyq ekspeditsiia Qaraǵandy oblysynyń Temirtaý, Qaraǵandy qalalaryna bet alady. Bul jerlerde ol kásibi turǵyda qalyptasyp, óz erik-jigerin, minez-qulqyn shynyqtyrdy. Osy jerde onyń saiasatker jáne memleket qairatkeri retinde sara joly bastaldy. Halyqtyq ekspeditsiianyń taǵy bir bóligi Ýkrainanyń Kamensk qalasyna barady. Bul qalamen Elbasynyń kóptegen jarqyn estelikteri bailanysty. Halyqtyq ekspeditsiia 2020 jyldyń naýryz aiyn Nursultan Nazarbaevtyń partiia jumysshysynan Táýelsiz Qazaqstannyń prezidentine deiingi joldy júrip ótken Almaty qalasynda qarsy alady, - dedi J.Túimebaev.
J.Túimebaevtyń aitýynsha, halyqtyq ekspeditsiianyń ekinshi baǵyty elimizdiń árbir óńirinde bolady. Al halyqtyq ekspeditsiia jolǵa shyǵatyn úshinshi baǵyt halyqaralyq marshrýt bolmaq.
Biz Elbasy taǵdyrynda mańyzdy ról atqarǵan adamdarmen kezdesip, suqbattasyp, ekspeditsiia kezeńinde kúndelik júrgizip otyramyz, - dedi Janseiit Qanseiituly.
Ol sonymen qatar, ekspeditsiia qorytyndysy 2020 jyldyń 6 shildesi - Tuńǵysh prezidenttiń týǵan kúni qarsańynda uiymdastyrylatyn Halyqaralyq konferentsiiada jariialanatynyn jáne belsendi qatysýshylardyń QHA-nyń "Halyq birligin nyǵaitýǵa qosqan úlesi úshin" premiiasymen marapattalatynyn aitty.
