Shymkent qalalyq jedel meditsinalyq kómek kórsetý aýrýhanasy janynan 3 qabatty qabyldaý-diagnostikalyq, reanimatsiialyq-ota jasaý korpýsy paidalanýǵa berildi, dep habarlaidy Ult.kz tilshisi.
Qazaqstan Respýblikasynyń Tuńǵysh Prezidenti kúni merekesine orai paidalanýǵa berilgen densaýlyq saqtaý nysanynyń ashylý rásimine oblys ákimi J.Túimebaev qatysyp, barsha meditsina salasynyń qyzmetkerlerin merekemen quttyqtady. Sonymen qatar, ákim mekeme ujymyna jańa jedel járdem avtokóligin syiǵa tartty.
Búginde elimizde kórsetiletin meditsinalyq qyzmetterdiń sapasyn arttyrý maqsatynda júieli jumystar atqarylyp jatqanyn aitqan aimaq basshysy búgingi qýanyshty oqiǵa osy jumystardyń aiǵaǵy ekenin jetkizdi.
«Jańadan salynǵan korpýs naýqastarǵa sapaly, joǵary tehnologiialyq meditsinalyq kómek kórsetý úshin zamanaýi meditsinalyq tehnikamen jáne meditsinalyq maqsattaǵy quraldarmen jabdyqtalyp otyr. Aýrýhana 2013 jyldan bastap insýlt kezinde bas miy jáne moiyn qan tamyrlaryna joǵary tehnologiialyq otalar jasaýǵa qol jetkizip, sol ýaqyttan beri munda 630 ota jasalyndy. Budan bólek, qalalyq jedel meditsinalyq kómek kórsetý aýrýhanasy bazasynda 90 búirek pen 13 baýyr almastyrý otalary jasalyndy», - dedi J.Túimebaev.
Atalǵan jańa korpýs 2 jylda salynyp, iske qosylyp otyr. Bul ǵimarattyń birinshi qabatynda ákimshilik, qabyldaý jáne zerthanalyq-diagnostikalyq bólimderi ornalastyrylsa, ekinshi qabatynda palatalar men reanimatsiia bólimi, al úshinshi qabatta 7 bloktan turatyn ota jasaý bólimi men búirek pen baýyr almastyratyn gepatopankreatobilarlyq hirýrgiia bólimi ornalastyrylǵan. Al emdelýshiler úshin statsionarda qosymsha 45 tósek-oryn qarastyrylǵan.
Shymkent qalalyq jedel meditsinalyq kómek kórsetý aýrýhanasy qala jáne oblys halqyna táýlik boiy hirýrgiia, jaraqat, ýrologiialyq, neirohirýrgiialyq, ginekologiialyq, nevrologiialyq jáne terapiialyq salalar boiynsha mamandandyrylǵan jáne joǵary mamandandyrylǵan jedel jáne josparly meditsinalyq kómek kórsetetin kópsalaly statsionar bolyp tabylady.
Kúndelikti aýrýhanaǵa 200-250 naýqas meditsinalyq kómekke júginedi. Orta eseppen olardyń 70-90 aýrýhanaǵa jatqyzylady. Emdeý mekemesi boiynsha jyl saiyn júieli túrde emdik is-sharalardyń innovatsiialyq, joǵary tehnologiialyq ádisteri óndiriske endirilýde.
Aita keteiik, osy jyly oblys boiynsha 38 densaýlyq saqtaý nysandarynyń qurylysyna oblystyq biýdjetten 3,8 mlrd. teńge qaralyp, qurylystary júrgizilse, onyń 34 nysany jyl sońyna deiin tapsyrý josparlanǵan.
